☰
काठमाडौँ । रसुवामा आएको भीषण बाढीपछि प्रभावित क्षेत्रमा उद्धार तथा राहत कार्यलाई तीव्रता दिन नेपाली सेना, सशस्त्र प्रहरी बल (एपीएफ) र नेपाल प्रहरीलाई व्यापक रूपमा परिचालन गरिएको छ।
प्रधानमन्त्री वालेन्द्र शाह (बालेनले सामाजिक सञ्जालमार्फत जानकारी दिँदै प्रभावित क्षेत्रको उद्धारका लागि थप जनशक्ति पठाइसकिएको र विपद् व्यवस्थापन प्राधिकरणलाई पूर्ण रूपमा सक्रिय बनाइएको बताएका छन्। सम्भावित जटिल अवस्थालाई ध्यानमा राख्दै सरकारी तथा निजी सबै हेलिकप्टरलाई ‘स्ट्यान्डबाइ’ (तयारी अवस्था) मा राख्न निर्देशन दिइएको छ।
उद्धार र राहतका लागि चालिएका प्रमुख कदमहरू:सुरक्षा निकाय र जनशक्ति: सेना, प्रहरी र एपीएफको टोली घटनास्थलमा तैनाथ हुनुका साथै अन्य जिल्लाबाट थप जनशक्ति प्रभावित क्षेत्रतर्फ रवाना भइसकेका छन्।
स्वास्थ्य र समन्वय: नेपाल स्काउट, रेडक्रस र मेडिकल टिमसँग समन्वय गरी थप एम्बुलेन्स तथा स्वास्थ्यकर्मीको टोली परिचालन गरिँदै छ।
तटीय क्षेत्रमा अलर्ट:नदी किनारका जोखिमयुक्त बस्तीका बासिन्दालाई तत्काल सुरक्षित स्थानमा सार्न सम्बन्धित प्रमुख जिल्ला अधिकारी (सिडिओ) लाई निर्देशन दिइएको छ। बासिन्दालाई एसएमएस र फोनमार्फत पूर्व सूचना पठाइएको छ।
हेलिकप्टर तयारी: आपत्कालीन उद्धारका लागि सरकारी र निजी दुवै क्षेत्रका हेलिकप्टर तयारी अवस्थामा राखिएको छ।
बाढीपछिको अवस्थाको समीक्षा र थप रणनीति तय गर्न केही बेरमै उच्चस्तरीय बैठक बस्ने प्रधानमन्त्री शाहले जनाएका छन्।
प्रधानमन्त्रीले जोखिमयुक्त क्षेत्रका नागरिकलाई धैर्य धारण गर्दै सुरक्षित स्थानमा रहन अपिल गरेका छन्। आफन्तसँग सम्पर्क हुन नसकेको अवस्थामा आधिकारिक निकायको अपडेट पर्खन र राहत तथा थप जानकारीका लागि १२३४ नम्बरमा सम्पर्क गर्न सरकारले आग्रह गरेको छ।
