काठमाडौं। प्रत्येक वर्ष असार १५ गते मनाइने राष्ट्रिय धान दिवस तथा दही चिउरा खाने पर्व आज देशभर विभिन्न कार्यक्रम गरी मनाइँदैछ।

मानो रोपेर मुरी उब्जाउने यो महत्त्वपूर्ण समयमा किसानहरू खेतका गरामा ब्यस्त रहँदै शक्ति प्राप्तिका लागि दही चिउरा खाने गर्दछन्। असारे गर्मी र कामको चटारोले थकित शरीरलाई दही चिउराले शीतलता प्रदान गर्नुका साथै ऊर्जा सञ्चय हुने जनविश्वास छ।

खेतीपातीमा संलग्न किसान मात्र नभई अन्य पेसा र व्यवसायमा रहेका नेपालीहरूले पनि आजको दिनलाई दही चिउरा खाने पर्वका रूपमा उत्साहका साथ मनाउने गर्दछन्। नेपाली संस्कृतिमा दहीको स्थान महत्त्वपूर्ण छ, शुभकार्यमा निस्कनुअघि, विदेश वा यात्रामा जाँदा दही-अक्षताको टीका लगाउने र सगुनका रूपमा दही खुवाएर बिदाइ गर्ने परम्परा रहिआएको छ।

नेपाल सरकारले विसं २०६१ मङ्सिर २९ गते मन्त्रीस्तरीय निर्णय गरी विसं २०६२ असार १५ गतेदेखि औपचारिक रूपमा राष्ट्रिय धान दिवस मनाउन सुरु गरेको हो। कृषिप्रधान देश नेपालमा वर्षभरिका लागि अन्न जुटाउन किसानहरू यो महिना निकै व्यस्त हुन्छन्।