☰
काठमाडौँ । चीनस्थित नेपाली दूतावासले त्यहाँ लगानी सम्मेलनको आयोजना गर्ने भएको छ ।
जुलाइ २–३ (असार १८ र १९) चीनको राजधानीमा बेइजिङमा हुने सो सम्मेलनमा चीनका उद्योगी व्यवसायी, लगानी कर्ताहरूको सहभागी रहने परराष्ट्र मन्त्रालय स्रोतले जनाएको छ ।
नेपालमा चिनियाँ लगानी प्रवर्द्धन गर्ने उद्देश्यले यो कार्यक्रम गर्न लागिएको हो । कार्यक्रममा नेपालबाट पनि उद्योगी, व्यापारीहरू सहभागी हुने बताइएको छ ।
यहाँबाट कोही सरकारी अधिकारी जाने कि नजाने अझै टुंगो लागेको छैन । को–को जाने त्यसको पनि हालसम्म टुंगो लाग्न सकेको छैन । परराष्ट्र मन्त्रालयको समन्वयमा लगानी सम्मेलनको तयारी चलिरहेको हो ।
परराष्ट्रमन्त्री शिशिर खनाल चीन भ्रमणमा गएका बेला पनि नेपाली दूतावासले एकदिने लगानी सम्मेलनको आयोजना गरेको थियो । त्यस सम्मेलनमा नेपालमा रहेका लगानीका अवसरबारे नेपाल लगानी बोर्डका प्रतिनिधिद्वारा प्रस्तुतीकरण गरिएको थियो ।
उक्त सम्मेलनको उद्घाटन गर्दै मन्त्री खनालले चिनियाँ लगानीकर्ताहरूलाई नेपालमा लगानी गर्न आग्रह गरेका थिए ।
नेपालको आर्थिक अवसर तथा जनसांख्याकीय सामर्थ्यलाई उजागर गर्दै थप सक्षम र व्यवसायमैत्री वातावरण सुनिश्चित गर्न नेपाल प्रतिबद्ध रहेको धारणा उनले राखेका थिए ।
नेपालमा चिनियाँ लगानी प्रवर्द्धन गर्ने उद्देश्यले राजदूतावासद्वारा आयोजित सम्मेलनकै अवसरमा मन्त्री खनालले चिनियाँ व्यवसायी, उद्यमी तथा लगानीकर्ताहरूसँग भेटघाट गरेका थिए ।
