काठमाडौं । अमेरिकाका ५६ प्रतिशत मतदाताले ट्रम्प प्रशासन संघीय सरकार सञ्चालन गर्न सक्षम नरहेको बताएका छन् ।

यस्तो मत दिनेहरूमा ७० प्रतिशत स्वतन्त्र मतदाता र ४० प्रतिशत रिपब्लिकन मतदाता रहेको फक्स न्युजले जनाएको छ । सर्वेक्षणमा ४३ प्रतिशत मतदाताले ह्वाइट हाउसले प्रभावकारी रूपमा सरकार सञ्चालन गरिरहेको विश्वास व्यक्त गरेका छन् ।

यद्यपि, सर्वेक्षणको निष्कर्ष सन् २०१५ को ओबामा प्रशासन र सन् २०२२ को बाइडेन प्रशासनको लोकप्रियताको हाराहारीमा रहेको बताइएको छ । सर्वेक्षणकर्ता डारन शका अनुसार मतदाताहरू प्रायः सबै राष्ट्रपतिहरूप्रति आलोचनात्मक हुने प्रवृत्ति राख्छन् ।

प्रमुख नीतिगत मुद्दाहरूमा ट्रम्पका अधिकांश नीतिहरूले नकारात्मक रेटिङ पाएका छन् । यद्यपि, सीमा सुरक्षाको मुद्दामा भने उनलाई बहुमतको समर्थन प्राप्त भएको देखिएको छ । सीमा सुरक्षामा ५३ प्रतिशत समर्थन र ४७ प्रतिशत विरोध रहेको छ ।

अध्यागमन मुद्दामा ४६ प्रतिशत समर्थन र ५४ प्रतिशत विरोध रहेको छ । चीन नीतिमा ४२ प्रतिशत समर्थन र ५७ प्रतिशत विरोध देखिएको छ भने परराष्ट्र नीतिमा ४० प्रतिशत समर्थन र ६० प्रतिशत विरोध रहेको छ ।

यस्तै, इरान नीतिमा ३७ प्रतिशत समर्थन र ६३ प्रतिशत विरोध रहेको छ । अर्थतन्त्रसम्बन्धी मुद्दामा ३४ प्रतिशत समर्थन र ६६ प्रतिशत विरोध रहेको छ ।

सरकारी खर्चमा ३३ प्रतिशत समर्थन र ६७ प्रतिशत विरोध रहेको छ । मुद्रास्फीतिको मुद्दामा सबैभन्दा कम २८ प्रतिशत समर्थन र ७२ प्रतिशत विरोध देखिएको छ ।

सर्वेक्षणमा ट्रम्प मन्त्रिपरिषद्का सदस्यहरूको लोकप्रियता पनि घट्दो देखिएको छ । उपराष्ट्रपति जेडी भान्सको ४४ प्रतिशत समर्थन र ५५ प्रतिशत विरोध रहेको छ ।

विदेशमन्त्री मार्को रुबियोको ४४ प्रतिशत समर्थन र ५६ प्रतिशत विरोध रहेको छ । रक्षामन्त्री पेट हेगसेथको ४१ प्रतिशत समर्थन र ५८ प्रतिशत विरोध रहेको पाइएको छ ।

राष्ट्रपतिको व्यक्तिगत गुणहरूका सन्दर्भमा पनि उल्लेखनीय तथ्यांक सार्वजनिक भएका छन् । मानसिक सन्तुलनको विषयमा ५५ प्रतिशत मतदाताले ट्रम्पसँग राष्ट्रपतिको जिम्मेवारी निर्वाह गर्न आवश्यक मानसिक सन्तुलन नभएको बताएका छन् । तुलना गर्दा सन् २०२४ मा ६५ प्रतिशत मतदाताले बाइडेनमा यस्तो क्षमता नरहेको बताएका थिए ।

यसैगरी सर्वेक्षणमा ६० प्रतिशत मतदाताले ट्रम्पको स्वभाव नेतृत्वका लागि उपयुक्त नरहेको बताएका छन् । साथै ६० प्रतिशतभन्दा बढी मतदाताले ट्रम्पले आफूजस्ता सामान्य नागरिकको वास्ता नगर्ने धारणा राखेका छन् ।