☰
काठमाडौं । इरानले युद्धबाट भएको आर्थिक क्षतिको पूर्ण क्षतिपूर्ति नपाएसम्म होर्मुज जलमार्ग नखोल्ने अडान दोहोर्याएको छ ।
अमेरिकी राष्ट्रपति डोनाल्ड ट्रम्पको पछिल्लो चेतावनीको जवाफ दिँदै एक वरिष्ठ इरानी अधिकारीले तेल ढुवानीका लागि अत्यन्त महत्त्वपूर्ण मानिने उक्त जलमार्ग तबसम्म सञ्चालनमा नआउने बताएका हुन् ।
ट्रम्पले तेहरानले सम्झौता नगरे वा जलमार्ग नखोले कडा सैन्य कारबाही गर्ने चेतावनी दिएका थिए । यसको प्रत्युत्तरमा मसुद पेजेस्कियानको कार्यालयका सञ्चार उपप्रमुख मेहदी ताबातबाईले अमेरिकी नेतृत्वले निराशा र आक्रोशका कारण आक्रामक भाषा प्रयोग गरेको आरोप लगाए ।
ताबातबाईका अनुसार, “होर्मुज जलमार्ग तब मात्र खुल्नेछ, जब नयाँ कानुनी व्यवस्थाअन्तर्गत लादिएको युद्धबाट भएको सम्पूर्ण क्षतिको क्षतिपूर्ति पारवहन शुल्कबाट तिरिने सुनिश्चित हुन्छ ।”
यसले इरानले अब आर्थिक दबाबमार्फत रणनीतिक लाभ लिन खोजिरहेको संकेत गर्छ ।
यसअघि पनि इरानले केही तेल ट्यांकरहरूको सुरक्षित आवागमनका लागि शुल्क लिने प्रस्ताव अघि सारेको थियो । तर, यस्तो प्रस्तावलाई विभिन्न देशहरू र अन्तर्राष्ट्रिय ढुवानी उद्योगका विज्ञहरूले विरोध गरेका छन् ।
यसैबीच संयुक्त राष्ट्रसंघमा रहेको इरानी नियोगले ट्रम्पको अभिव्यक्तिलाई नागरिक पूर्वाधार नष्ट गर्ने खुला धम्कीको रूपमा व्याख्या गरेको छ ।
नियोगले अन्तर्राष्ट्रिय समुदायलाई तत्काल हस्तक्षेप गर्न आह्वान गर्दै यस्ता कार्यहरूलाई ‘गम्भीर युद्ध अपराध’को संज्ञा दिएको छ र समयमै कदम नचाले परिणाम झन् भयावह हुनसक्ने चेतावनी दिएको छ ।
