काठमाडौं । इरानले बुधबार राति हिन्द महासागरमा एक अमेरिकी एफ–१८ फाइटर जेट खसालेको दाबी गरेको छ ।
इस्लामिक रिभोलुसनरी गार्ड कप्र्सका अनुसार, यो कारबाही देशको दक्षिणी तटीय क्षेत्रनजिकै गरिएको हो ।

तेहरानले एउटा भिडियो सार्वजनिक गरेको छ, जसमा एक फाइटर जेट आकाशमै ब्यालिस्टिक मिसाइल जस्तो देखिने वस्तुले लागेपछि उचाइ गुमाउँदै खसेको देखिन्छ । इरानको प्रेस टीभीले आफ्नो आधिकारिक एक्स च्यानलमा यो भिडियो पोस्ट गर्दै लेखेको छ, “इरानको इस्लामिक रिभोलुसनरी गार्ड कप्र्सले अमेरिकी एफ–१८ फाइटर जेटलाई सफलतापूर्वक निसाना बनाएको घोषणा गर्दछ ।”

यद्यपि, उक्त पोस्टमा आक्रमणको सटीक स्थान, क्षतिको स्तर वा पाइलटको अवस्थाबारे कुनै विस्तृत विवरण दिइएको छैन ।
भिडियो फुटेजमा विमान उडिरहेको बेला अचानक एउटा प्रकाशको चमकले यसलाई प्रहार गरेको देखिन्छ । केही क्षणपछि, जेट अनियन्त्रित भएको र धुवाँको मुस्लो छोड्दै खसेको जस्तो देखिन्छ । तर, स्वतन्त्र रूपमा यस भिडियोको सत्यता पुष्टि नभएको सञ्चारमाध्यमहरूले जनाएका छन् ।

यद्यपि, अमेरिकाले यस दाबीलाई अस्वीकार गरेको छ । अमेरिकी सेन्ट्रल कमान्डले इरानले कुनै पनि अमेरिकी फाइटर जेट नखसालेको स्पष्ट पारेको छ ।