☰
फागुन २१ को मतदानको दिन सङ्घारमा आइपुग्दा नेपाल कम्युनिष्ट पार्टी (एमाले)का अध्यक्ष तथा निवर्तमान प्रधानमन्त्री केपी शर्मा ओली आफ्ना फलोअर्सलाई ‘ब्लक’ गर्ने काममा दैनिक लागिरहेका देखिन्छन् । यसअघि आफ्ना साधक बनेका सामाजिक सञ्जालका फलोअर्स अहिले उनकै लागि बाधक बनिरहेका छन् ।
अधिकांश फलोअर्सबाट दैनिकजसो सुझाव र आलोचना आउन थालेपछि सापेक्ष कडा र आक्रामक बन्दै गइरहेका फलोअर्सलाई पेजबाट हटाउने र ब्लक गर्ने कामलाई ओलीले तीब्र बनाउँदै लगिरहेका छन् ।
परिणामतः ओलीको फेसबुक पेजमा ‘हाइहाइ’ गर्नेको सानो पङ्क्तिले मात्र स्थान पाउन थालेको छ । उनको पेजमा स्थान पाउन छोडेपछि बाहिरिने पङ्क्ति आश्चर्यजनक रूपमा बढ्दो छ । सुरूसुरूमा सामाजिक सञ्जाललाई ‘साइबर खेल’ वा मजाकको रूपमा लिने र साथमा रहेका साथीसँग रसिला विमर्शमा रमाउने ओली अहिले भने निकै गम्भीर देखिन थालेका छन् ।
केवल सङ्गठन भएपछि सबै कुरा संभव हुन्छ भन्ने ओली १९औं शताब्दीको सुरूतिर रूसमा लेनिन र मध्यतिर चीनमा माओले गरेका महापरिवर्तनका कामबाट बढी प्रभावित देखिन्छन् । यसरी क्रान्तिको मनोवैज्ञानिक मान्यताका हिसाबले नियाल्ने हो भने ओलीको मनोविज्ञान शीतयुद्धभन्दा अघिको प्रतित हुन थाल्छ ।
ओलीको यो मनोविज्ञानले वर्तमान नेपालमा रहेका समग्र कम्युनिष्ट पार्टी र तिनका नेताहरूको मनोविज्ञानको पनि प्रतिनिधित्व गर्दछ । अहिले समय फेरिएको छ । कम्युनिष्ट पार्टीमा भने फेरिएको समय अनुसारको विचार, आचरण र व्यवहारमा परिवर्तन आउनु जरूरी छ ।
एक पालाको समय थियो, पृथ्वीमा भीमकाय शरीर भएको डाइनोसरको अस्तित्व थियो । ती लाोप भए । भनिन्छ, समय र परिस्थितिले तिनलाई साथ दिएन । तर सत्य कुरा यो हो कि ती डाइनोसर बदलिएको परिस्थिति अनुसार आफूमा बदलाव ल्याउन सकेनन् ।
अहिलेको समय परिवर्तनको समय हो । तर समयले चाहेको र माग गरेको विशिष्टता अनुरूपको परिवर्तनको सार र स्वरूप पहिचान तथा तदनुरूपको रणनीतिगत र कार्यनीतिगत विचार तथा कार्यक्रम विकास गर्ने क्षमताको सर्वथा अभाव रहनु कम्युनिष्टहरूको ठूलो असक्षमता हो ।
होइन भने हरेक परिवर्तनसँगै सिङ्गो संसारलाई समाजवादहुँदै साम्यवादको शिखरमा पुर्याउने जिम्मेवारी कम्युनिष्ट पार्टी र तिनका नेताहरूको हो । तर विडम्वना ! विज्ञान र प्रविधिको बोध पनि नहुने र प्रतिस्पर्धात्मक उपयोगमा श्रेष्ठता पनि हासिल गर्न पनि नसक्ने भएपछि एमाले, माओवादीसहितका नेता तथा तिनका पार्टीहरू अब तिनका सामाजिक सञ्जालमा सल्लाह दिइरहेका र आलोचना गरिरहेका फलोअर्सलाई ब्लक गर्ने र आफै विमुख हुने काम नै अबको क्रान्तिको बाँकी रहेको कार्यभार बन्न गएको देखिन्छ ।
