मंसिर २६,काठमाडौं । नेपाल प्रिमियर लिग (एनपीएल) को बुधबारको पहिलो खेलमा टस हारेको सुदूरपश्चिम रोयल्सले पहिला ब्याटिङ गर्दै ९ विकेटमा १२३ रन बनाएको छ । जनकपुर बोल्ट्सका कप्तान अनिल साहले टस जितेपछि सुदूरपश्चिमलाई पहिला ब्याटिङको निम्तो दिएका थिए ।
पावर प्लेमा राम्रो सुरुवात पाएको सुदूरपश्चिमले त्यसलाई क्याप्टिलाइज गर्न नसक्दा ठूलो स्कोर बनाउनबाट चुकेको छ । सुदूरपश्चिमले पावर प्लेमा विना क्षति ४२ रन बनाएको थियो । तर, पावर प्लेपछि सुदूरपश्चिमको ब्याटिङ लाइन धर्मरायो ।
पछिल्लो पाँच ओभरमा सुदूरपश्चिमले ३९ रन बनाउँदा चार विकेट गुमाएको छ । जनकपुरका किशोर महतोले एकै ओभरमा तीन विकेट लिए । उनले १८ औँ ओभरमा इशान पाण्डे, आरिफ शेख र स्कट कुलेगेनको विकेट लिए । उनले २० औँ ओभरमा नरेन साउदको विकेट लिए । यस्तै अरनिको महतो र शेर मल्लले दुई दुई विकेट लिए भने हर्ष ठाकरले एक विकेट लिए । यसअघिका खेलमा लगातार विकेट लिइरहेका ललित राजवंशी भने यो खेलमा विकेटविहीन रहे ।
सुदूरपश्चिमका लागि विनोद भण्डारीले सर्वाधिक ३३ रन बनाए भने सैफ अली जैबले २१ र इशान पाण्डेले १७ रनको योगदान दिए । कप्तान दीपेन्द्रसिंह ऐरी शून्यमा आउट भएका थिए । जारी प्रतियोगितामा जनकपुर अपराजित छ भने सुदूरले एक खेलमा हार व्यहोरेको छ ।