☰
काठमाडौं । भारतीय लेखक मनोज मुन्तासिरले चलचित्र ‘आदिपुरुष’ लेख्नु आफ्नो गल्ती भएको स्वीकार गरेका छन् । दोस्रो ठूलो गल्ती यो थियो कि उनले मिडियाको अगाडि खराब संवादलाई स्पष्ट पारे । उनले अन्जानमा धार्मिक भावनामा चोट पुर्याएकोमा माफी पनि मागेका छन् ।
उनले अरुजस्तै आफूले पनि गल्ती सच्याउने दोस्रो मौका पाउनु पर्ने बताए । रिलिजपछि उनलाई नराम्रो संवादका कारण ज्यान मार्ने धम्की आएको थियो । यही कारण उनी भारत छोडेर केही दिन विदेश गएका थिए । आजतकसँगको कुराकानीमा उनले आदिपुरुष लेख्दा शतप्रतिशत गल्ती भएको स्वीकार गरे ।
उनले भने, ‘यसमा कुनै शंका छैन । म त्यस्तो मान्छे होइन कि मैले राम्रो लेखेको छु भनी आफ्नो गल्तीको रक्षा गरुँ । यो मेरो गल्ती हो तर यो गल्तीको पछाडि कुनै नराम्रो नियत थिएन । धर्मलाई चोट पुर्याउने मेरो उद्देश्य थिएन । मैले जानाजानी भगवान राम वा हनुमानजीको बारेमा बदनाम गर्न को लागी केहि गलत लेखेको छैन ।’
उनले थप भने, ‘हो, मैले ठूलो गल्ती गरेको छु । यो घटनाबाट मैले धेरै कुरा सिकेको छु । अब देखि म धेरै होसियार हुनेछु ।’
फिल्म रिलिजपछि मनोज मुन्तासिरलाई उनको अपमानजनक संवादका कारण धेरै ट्रोल गरिएको थियो । त्यसपछि सञ्चारमाध्यममा आएर उनले आधुनिक रुपान्तरणलाई ध्यानमा राखेर यस्ता संवाद लेखिएको स्पष्ट पारे । उनले भनेका थिए- यो फिल्मको नाम ‘आदिपुरुष’ हो, रामायण होइन । हामीले रामायण बनाएका होइनौं । हामी केवल यसबाट प्रेरित छौं ।’
यो भनाइले जनता थप आक्रोशित भए । यस विषयमा स्पष्टीकरण दिँदै उनले अब भनेका छन्- ‘जब जनता आक्रोशित थिए, मैले यस विषयमा स्पष्टीकरण दिनु हुँदैनथ्यो भन्ने लाग्छ । यो मेरो सबैभन्दा ठूलो गल्ती थियो । त्यतिबेला केही नभन्नुपर्थ्यो । यदि मेरो स्पष्टीकरणबाट जनता रिसाएका छन् भने उनीहरुको आक्रोश जायज छ किनकी त्यो स्पष्ट गर्ने समय थिएन र आज त्यो गल्ती बुझ्दैछु ।’
फिल्म रिलिज भएपछि आफूलाई ज्यान मार्ने धम्की आउन थालेको मनोजले बताए । उनको सुरक्षाको लागि परिवार डराउन थाले । यही कारण उनी केही समय विदेश गएर विवाद अन्त्य हुने प्रतिक्षामा थिए । यसमा उनले थप भने, ‘संसारले तिमीलाई आज राम्रो र भोलि नराम्रो मान्नसक्छ तर तपाईं आफ्नो परिवारको लागि नायक हुनुहुन्छ ।’
टिजर रिलिज हुनासाथ फिल्म विवादमा परेको थियो । फिल्ममा तथ्यलाई गलत देखाइएको आरोप लाग्यो । फिल्म १६ जुनमा रिलिज भएको थियो । त्यसपछि यसमा देखाइएका संवादलाई लिएर निकै विवाद भएको थियो । पछि निर्माताहरूले केही संवादमा परिवर्तन गरे तर पनि विवाद समाप्त भएन ।
जनताको विरोधपछि मात्र फिल्म दुई सातामै हलबाट बाहिरियो । ६०० करोडको बजेटमा बनेको यो फिल्मले भारतमा २८६.३७ करोड कमाएको थियो । जसमध्ये १४७.२६ करोड रुपैयाँ हिन्दी संस्करणको हो ।
