☰
नयाँ सरकार निर्माण भएसँगै राष्ट्रपति विद्यादेवी भण्डारीले सरकारको सिफारिसमा संघीय संसदको दुवै सदनको अधिवेशन आह्वान गरेपछि संसद गतिशील बन्ला वा गतिहीन भन्ने कुरालाई लिएर सबैले चासोका साथ हेरिरहेका छन् ।
संसदमा अहिले सबैभन्दा ठूलो दल नेपाली काँग्रेसको बलियो प्रतिपक्ष रहेको छ । यो प्रतिपक्षका साथ अन्य दलहरूको गठबन्धन पनि छ ।
सरकारले बहुमत पुर्याए पनि संसदमा भने प्रतिपक्षको आवाज जनादेशसहितको बलियो रहेको छ । यस्तो बेलामा संसदले गर्ने काम निकै पेचिलो र रस्साकस्सीपूर्ण हुने देखिन्छ ।
संसदले पहिले त यसको सञ्चालनका लागि सभामुख र उपसभामुखको चयन गर्ने एजेण्डा कार्यान्वयन गर्नु छ । यसका लागि प्रतिपक्षले पनि आफ्नो दावा गर्ने र उम्मेदवार खडा गर्ने अवस्था संसदमा बलियो रहेको छ ।
यसमा खेल निकै हुन सक्ने र एकअर्कामा बलाबलको अवस्था सिर्जना हुने अनुमान अस्वीकार्य छैन । यो नयाँ गठबन्धनद्वारा निर्मित प्रचण्ड सरकारका लागि पहिलो अग्नि परीक्षा साबित हुने देखिन्छ ।
यो परीक्षामा उत्तीर्ण भएपछि संसदमा केही स्थिरता आउने अनुमान लगाउन सकिन्छ । तथापि प्रचण्ड सरकारले संसदका लागि आवश्यक ‘विजनेस’ दिन सक्ने हो वा होइन भन्ने आशंका त छँदैछ ।
यस अघिका कुनै पनि सरकारले सही र सापेक्ष विजनेस संसदलाई दिन असफल रहेको तथ्य जनताका सामु जीवितै छ । यस पटक पनि सरकार आशंकाको घेराभन्दा बाहिर छैन ।
यदि सरकारले संसदलाई विजनेस दिन सकेन भने यो संसद बन्धक बन्ने देखिन्छ । यसले संसदको गतिशीलतालाई रोक्ने छ ।
अघिल्ला संसदहरूले कुनै पनि उल्लेखनीय काम गर्न सकेनन् । यी सधैं गठबन्धन दलहरूको वा सरकारको बन्धक बनेर समय व्यतित गरे ।
जनताले चाहेका, देशको भलो हुने र कतिपय तत्काल गर्नैपर्ने कुनै पनि काम समयमा हुन कठिन हुन गए । संसद अधिवेशन आधा रातमा बन्द गरिने र केवल सरकारको चासोको विषय मात्र बन्न पुगे ।
यी तीता यथार्थता जनताका आँखाबाट लुक्न संभव थिएन । फलतः दर्जनौ अति आवश्यक विधेयकहरू संसदमा थला परेर बसिरहे । अहिले पनि त्यस्ता धेरै विधेयकहरू संसदमा थाति रहेका छन् ।
यी अतिरिक्त नयाँ परिस्थितिले सिर्जना गरेका धेरै कुराहरू कानुन निर्माण गरेर संबोधन हुन बाँकी छन् । यी कुराहरू पूरा गर्नु वर्तमान संसदको कार्यभार बनेर आएको छ ।
संसदको आह्वान हुँदै गर्दा सरकार र सरकार निर्माण गर्न पुगेको गठबन्धनले यी कुरामा चासोपूर्वक गम्भीर ध्यान दिनुपर्छ । ताकि सार्वभौम संसद गतिशील हुन सकोस् ।
देश र जनताले चाहेको संसदको यो गतिशीलता त्यत्तिकै आउने देखिन्न । यसका लागि सरकार गठनमा सम्मिलित सबै राजनीतिक दलहरूमा परिपक्वता र आवश्यक लचकता देखिनु पर्छ ।
पूर्वाग्रह र अज्ञानताले संसद गतिशील हुन सक्दैन । यसका लागि सरकार तथा सत्तासिन राजनीतिक दलहरू अहिले देखि शान्त र शितल विवेकले एजेण्डा प्राथमिकीकरण गरी संसदको विजनेस बारे समयमै गृहकार्य गरिसक्नु पर्छ ।
