एजेन्सी । इटालियन क्लब एसी मिलान आठ वर्षपछि युइएफए च्याम्पियन्स लिग फुटबलको नकआउट चरणमा प्रवेश गरेको छ।

बुधबार राति समूह चरणको अन्तिम खेलमा आरबी साल्जवर्गलाई ४-० ले हराउँदै मिलान अघिल्लो चरणमा प्रवेश गरेको हो।

घरेलु मैदान सान सिरोमा मिलानलाई जिताउन ओलिभर जेरुडले दुई गोल गरे भने रेड क्रुनिक र जुनियर मेसियासले एक-एक गोल गरे।

जितसँगै समूह ‘ई’ को दोस्रो स्थानमा रहँदै मिलानले अर्को चरणमा स्थान बनाएको हो। यस समूहको विजेताको रूपमा इंग्ल्यान्डको चेल्सी अन्तिम १६ मा प्रवेश गरिसकेको छ।