☰
घुस लिने र दिने दुबैका लागि अख्तियारले चलाएको स्टिङ अप्रेसन अहिले पनि जारी छ । सर्वोच्चले अमान्य घोषणा गरे पनि यो जारी रहेपछि जनतामा राहत छाएको छ ।
तर घुस्याहाहरुका बीचमा यसले तबाही मच्चाएको छ । घुस तथा भ्रष्टाचार नियन्त्रणका लागि अख्तियार दुरुपयोग अनुसन्धान आयोगले सुरु गरेको ‘स्टिङ अप्रेसन’ उत्तिकै प्रभावकारी पनि छ ।
सर्बोच्च अदालतले संविधानका विभिन्न प्रावधानसँग बाझिएका भन्दै त्यसो नगर्न निर्णय सुनाए पनि अख्तियारले यस कार्यलाई जारी राखेको छ । यो सह्रानीय पनि छ ।
प्रशासनिक इकाइमा रहेका कर्मचारीहरुले अख्तियारको दुरुपयोग गरी लिइने घुस नियन्त्रणका लागि सुरु गरेको ‘स्टिङ अप्रेसन’ले एकपछि अर्को सफलता पाउँदै पनि गैरहेको छ ।
यो अप्रेसन सानो आकारमा देखिए पनि कर्मचारीको भीमकाय वृत्तभित्र पस्न सफल भएकाले आमजनतालाई ठूलो राहत दिएको छ । सर्वोच्चको फैसलापछि पनि जारी रहेको स्टिङ अप्रेशनमा कर्मचारी, प्रहरी, जनप्रतिनिधिहरु घुससहित रंगेहात पक्राउ परिरहेका छन् ।
स्थानीय तथा तल्लो निकायमा सानो परिमाणमा देखिने यस्ता घुस तथा भ्रष्टाचारजन्य कामहरुले स्थानीय जनतामा निकै ठूलो समस्या सिर्जना गरिरहेको छ । जनताको घरदैलोमा सिंहदरवार भने पनि सिंहदरवारको आर्थिक अनियमितता तथा भ्रष्टाचार स्थानीय निकायसम्म पुगेको छ ।
स्थानीय सरकारी कार्यालय, स्थानीय निकाय तथा सेवाप्रवाहका संस्थाहरुमा जनता पुग्दा त्यहाँ सेवाप्रदायक भनिनेहरुले नै स्थानीय सेवाग्राहीहरुबाट घुस लिने गरिरहेका छन् । अख्तियार दुरुपयोग अनुसन्धान आयोगको हालको स्टिङ अप्रेसन यसैमा केन्द्रित रहेको देखिन्छ ।
हेर्दा मामुली खालका देखिने तर जनताका लागि अत्यावश्यक सेवा लिन पुग्दा जनप्रतिनिधि, कर्मचारी र प्रहरीले घुस लिने गरिरहेका छन् । बिजुली, पानी, सिफरीश, शिक्षा तथा स्वास्थ्यका सेवा तथा वैंकबाट ऋणकर्जा वा यस्तै घरेलु समस्या समाधानका लागि सम्बन्धित कार्यालयका मानिसहरुले घुस लिने गरिरहेका छन् ।
पछिल्लो समयमा त यसका लागि कार्यालयको वरिपरि ‘कामको सहजता’का नाममा बिचौलियाहरु डेरा जमाएर बस्ने गरिरहेका छन् । घुस लिने काम सिधै पनि र बिचौलियामार्फत् पनि हुने गरिरहेका छन् ।
यसले आमजनतामा एक खालको आतंक छाइरहेको छ । जनता सेवा लिएर आफ्ना समस्या समाधान गर्ने भन्दा पनि ‘हातमा चार पैसा छैन, के लिएर सेवा लिन जानु’ भन्दै सेवा लिनुअघि मेवा खुवाउनु पर्ने समस्याले निकै प्रताडित छन् ।
अख्तियारको स्टिङ अप्रेसनले यस अर्थमा आम जनतामा केही राहत अवश्यै दिलाएको छ । कोही नभए पनि नचिनेको तर भद्रजस्तो मानिस स्थानीय तथा अन्य अफिसहरुको छेउँछाउँमा घुमेको देखियो भनेपनि त्यस दिन स्थानीय सेवाप्रदायकहरुले घुस नमागेर चूपचाप काम गर्ने गरेको स्थानीय जनताको अनुभूति छ ।
त्यसमा पनि अख्तियार दुरुपयोग अनुसन्धान आयोगले घुस लिँदै गरेकालाई रंगेहात पक्राउ गरेर अनुसन्धान तथा कार्वाही थालेपछि यसले जनतासँग सिधै पैसो मागिहाल्ने घुस्याहाहरुको आँटमा केही कमी भने ल्याएको छ ।
तर ‘भोलि आउनुुस्’ भनेर अर्को तरिकाले दुःख दिने काममा भने कमी आउन सकेको छैन । अख्तियारले यसलाई पनि ख्याल राख्नु पर्ने र ‘फलो’ गर्नुपर्ने अवस्था सिर्जना हुन गएको छ ।
तात्कालीन अवस्थामा स्टिङ अप्रेशन बन्द गरिनु पर्छ भनेर फैसला सुनाउने संवैधानिक इजलासका प्रमुख प्रधानन्यायाधीश चोलेन्द्रशमशेर जबरा अहिले महाअभियोग खेपिरहेका छन् ।
उक्त इजलासले उल्टै ‘आयोगले आफैं घुस रकम उपलब्ध गराएर गर्ने ‘स्टिङ अप्रेसन’ले व्यक्तिको स्वतन्त्रता र मर्यादामा आँच पु¥याउने र संविधानले सुनिश्चित गरेको मौलिक हकविरुद्धसमेत हुने’ भन्ने बेहोराको निवेदन अधिवक्ता विष्णुप्रसाद घिमिरेले सर्वोच्चको संवैधानिक इजलासमा दिएका थिए ।
तर अख्तियारले यो आरोप तत्काल अस्वीकार गरेको थियो । अख्तियारको स्टिङ अप्रेसनले जनसाधरणलाई राहत दिलाउँदै आएको छ ।
