ललितपुर  ।  नेपाली कांग्रेसको १५औँ महाधिवेशनबाट सभापतिमा नवनिर्वाचित गगनकुमार थापाको शपथग्रहण तथा पदबहाली शनिबार हुने भएको छ ।

बडादसैँको फूलपातीका अवसरमा नेपाली कांग्रेस केन्द्रीय कार्यालय सानेपामा अपराह्न २ बजे शपथग्रहण कार्यक्रम आयोजना गरिएको पार्टीले जनाएको छ ।

महाधिवेशनको सभापति पदको मतगणना सम्पन्न भई परिणाम सार्वजनिक भएपछि निर्वाचित थापाको शपथग्रहण तथा पदबहालीका लागि कार्यक्रम तय गरिएको हो ।

शपथग्रहण तथा पदबहाली समारोहमा सहभागी हुन केन्द्रीय कार्यालयले काठमाडौँ उपत्यकामा रहेका पार्टीका नेता, कार्यकर्ता तथा सञ्चारकर्मीलाई निमन्त्रणा गरेको कार्यवाहक मुख्यसचिव कृष्णप्रसाद दुलालले जानकारी दिए ।

नवनिर्वाचित केन्द्रीय समितिका अन्य पदाधिकारी तथा सदस्यहरूको शपथ भने दसैँपछि मात्र गरिने कांग्रेसले जनाएको छ । संशोधित विधानअनुसार १५औँ महाधिवेशनबाट २३१ सदस्यीय समिति निर्वाचित भएको छ ।