☰
काठमाडौं । ८३ वर्षको उमेरमा लेखक तथा पूर्वमन्त्री एम.एस. थापा मगरद्वारा लिखित तीन पुस्तक एक समारोहबीच विमोचन गरिएको छ।
थापा मगरद्वारा लिखित ‘चीनमा मगरहरू’, ‘नेपालमा को कति राष्ट्रवादी ?’ र ‘समानुपातिक सिद्धान्त’ नामक पुस्तक विमोचन गरिएको हो।
लामो समयदेखि विभिन्न सामाजिक, राजनीतिक तथा ऐतिहासिक विषयमा अध्ययन र लेखन गर्दै आएका थापा मगरका कृतिमा मगर समुदाय, राष्ट्रवाद तथा समानुपातिक प्रतिनिधित्व लगायतका विषय समेटिएका छन्।
पुस्तक विमोचन समारोहमा लेखकका छोरा डा. अजय सिंह थापाले आफ्ना ८३ वर्षीय बुबाले लेखेका तथा लामो समयदेखि पाठकले प्रतीक्षा गरेका पुस्तकहरूको विमोचन समारोहको साक्षी बन्न पाउँदा आफूलाई गर्व लागेको बताए।
उनले यी पुस्तकहरू वर्तमान पुस्ताका लागि अध्ययन सामग्री बन्नुका साथै भविष्यमा हुने अनुसन्धान र शिक्षाका लागि समेत महत्वपूर्ण आधार बन्ने विश्वास व्यक्त गरे।
थापा मगरका तीन कृतिले इतिहास, समाज, राजनीति, राष्ट्रवाद, प्रतिनिधित्व तथा मगर समुदायसँग सम्बन्धित विषयमा थप अध्ययन, अनुसन्धान र बहसका लागि महत्वपूर्ण सामग्री उपलब्ध गराउने अपेक्षा गरिएको छ।
पुस्तक विमोचन कार्यक्रममा लेखकका परिवार, साहित्य तथा सामाजिक क्षेत्रका व्यक्तित्व, बुद्धिजीवी, अध्येता तथा शुभेच्छुकहरूको उपस्थिति रहेको थियो।
पुस्तकप्रति पाठक तथा शुभेच्छुकको सकारात्मक प्रतिक्रिया
पुस्तक विमोचनपछि लेखक एम.एस. थापा मगरका कृतिप्रति पाठक, शुभेच्छुक तथा मगर समुदायका विभिन्न व्यक्तिहरूले सकारात्मक प्रतिक्रिया व्यक्त गरेका छन्। सामाजिक सञ्जालमार्फत बधाई तथा शुभकामना दिँदै धेरैले पुस्तक पढ्न उत्सुक रहेको बताएका छन्।
प्रतिक्रियामा थापा मगरलाई मगर अभियानका अग्रणी व्यक्तित्व, इतिहासकार, पूर्वमन्त्री, लेखक तथा सामाजिक अभियन्ताका रूपमा सम्मान व्यक्त गरिएको छ। कतिपयले पुस्तकमार्फत मगर समुदायको इतिहास, पहिचान तथा विभिन्न सामाजिक–राजनीतिक विषयबारे थप जानकारी प्राप्त गर्न सकिने अपेक्षा व्यक्त गरेका छन्।
शुभेच्छुकहरूले पुस्तकको एक प्रति आफूहरूलाई समेत उपलब्ध गराइदिन आग्रह गरेका छन् भने केही पाठकले पुस्तक पढिसकेको उल्लेख गर्दै सामग्री निकै रोचक र ज्ञानवर्द्धक रहेको प्रतिक्रिया दिएका छन्।
एक शुभेच्छुकले एम.एस. थापा मगरलाई ‘बहुआयामिक व्यक्तित्व तथा राजनीति, इतिहास, संस्कृति र भाषालगायतका क्षेत्रमा गहिरो अध्ययन र अनुसन्धान भएका विद्वान्’ भन्दै उनको लेखनप्रति सम्मान व्यक्त गरेका छन्।
त्यस्तै, सामाजिक सञ्जालमा ‘गर्वको क्षण’, ‘धेरै खुसी लाग्यो’, ‘हार्दिक बधाई तथा शुभकामना’, ‘पुस्तकको प्रतीक्षामा छौं’ लगायतका प्रतिक्रिया आएका छन्। लेखक तथा उनका परिवारलाई बधाई दिँदै पुस्तकले मगर समुदायसम्बन्धी अध्ययन, अनुसन्धान र बहसमा योगदान पुर्याउने विश्वाससमेत व्यक्त गरिएको छ।
