तेहरान । इरानले स्ट्रेट अफ होर्मुज आसपास अमेरिकी नौसैनिक जहाजसहित विभिन्न पानीजहाजमाथि आक्रमण गरेर सफलता हासिल गरेको दाबी गरेको छ । इरानी अधिकारीहरूका अनुसार ती आक्रमणका कारण अमेरिकाले आफ्ना युद्धपोतहरू इरानी तटबाट थप टाढा सार्न बाध्य भएको छ ।

यो दाबी त्यतिबेला आएको हो, जब अमेरिकी सञ्चारमाध्यमहरूले आइतबार १४ सेप्टेम्बरमा स्ट्रेट अफ होर्मुजमा इरानले प्रहार गरेको एन्टिसिप क्रुज क्षेप्यास्त्रको निशानामा परेको घटनामा आठ अमेरिकी मरीन सैनिकलाई धुवाँका कारण श्वासप्रश्वासमा समस्या तथा सम्भावित मस्तिष्क चोट लागेको रिपोर्ट सार्वजनिक गरेका छन् ।

उक्त रिपोर्टबारे टिप्पणीका लागि सम्पर्क गरिए पनि अमेरिकी सेन्ट्रल कमान्ड (सेन्टकम) ले प्रतिक्रिया दिएको छैन । यसअघि सेन्टकमले अमेरिकी पानीजहाजहरूले यसै महिनाको सुरुआतमा इरानले प्रहार गरेका ब्यालिस्टिक क्षेप्यास्त्रबाट सफलतापूर्वक जोगिएको जनाएको थियो ।

अमेरिकी अधिकारीहरूलाई उद्धृत गर्दै प्रकाशित रिपोर्टमा आक्रमणको समयमा ती सैनिकहरू सवार पानीजहाज अमेरिकी नौसेनाको जहाज नभएको उल्लेख छ ।

अमेरिकी रक्षा मन्त्रालयले यसअघि गोप्य रूपमा २९ अमेरिकी नाविक र आठ मरीनलाई युद्धमा घाइते सैनिकको सूचीमा थपेको थियो । यससँगै २८ फेब्रुअरीमा युद्ध सुरु भएयता घाइते अमेरिकी सैनिकको संख्या ८६१ पुगेको छ । कम्तीमा १९ जनाको मृत्यु भएको बताइएको छ ।

अमेरिकी युद्धपोत पछि हटेको इरानी दाबी

पछिल्ला दिनहरूमा इरानसँग सम्बन्धित सरकारी सञ्चारमाध्यमहरूले अमेरिकी युद्धपोतहरू यसै महिनाको सुरुआतमा आफ्नो अघिल्लो नाकाबन्दी क्षेत्रबाट पछि हटेको दाबी गरेका छन् ।
ती जहाजहरू यसअघि इरानी बन्दरगाह चाबहार तथा ओमानको खाडी प्रवेशद्वारनजिक तैनाथ रहेकोमा अहिले इरानी क्षेप्यास्त्रबाट बच्न मध्य अरब सागरतर्फ थप पछाडि सरेको ती रिपोर्टमा उल्लेख गरिएको छ ।

इरानका सर्वोच्च नेता मोज्तबा खामेनेईको नाममा सोमबार सरकारी सञ्चारमाध्यमले प्रकाशित गरेको सन्देशमा पनि अमेरिकी नौसैनिक गतिविधितर्फ संकेत गरिएको देखिन्छ ।

उनले स्ट्रेट अफ होर्मुजका ‘बहादुर लडाकु तथा सुरक्षाकर्मी’बाट अमेरिकी सेनाले पीडादायी प्रहार खेपेकाले थप अघि बढ्नबाट रोकिएको दाबी गरेका छन् । उनको सन्देशमा अमेरिकी सेनाले जोखिम मोलेर अघि बढ्दा आफूलाई नै क्षति पुगेको र ‘छिट्टै अरब सागर पनि उनीहरूबाट खाली हुने’ दाबी गरिएको छ ।

अमेरिकाले भने इरानका दक्षिणी बन्दरगाहमा कुनै न कुनै रूपमा नौसैनिक नाकाबन्दी कायम राखेको छ । साथै, स्ट्रेट अफ होर्मुज पुनः खोल्ने सम्बन्धमा इरानले अघि सारेको पछिल्लो प्रस्तावलाई अमेरिकाले अस्वीकार गरेको छ ।

तेहरानले आवश्यक परे रक्षात्मक तथा आक्रामक दुवै सैन्य कारबाहीका लागि तयार रहेको बताइरहेको छ । विश्लेषकहरूले भने तत्कालै पूर्णस्तरको युद्ध पुनः सुरु हुने सम्भावना कम भए पनि नियन्त्रित रूपमा तनाव बढ्ने क्रम जारी रहन सक्ने बताएका छन् ।