☰
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले सरकारले आफ्नो लक्ष्य र वाचा अनुसार काम नगरे पार्टीले हस्तक्षेप गर्ने बताएका छन् ।
काठमाडाैंमा नेपाली युवा उद्यमी मञ्चको २२औं वार्षिक साधारण सभामा बाेल्दै सभापति लामिछानेले यस्ताे बताएका हुन् । सरकारको कार्यशैली र स्थायित्वका विषयमा टिप्पणी गर्दै उनले सरकार बाटोबाट विचलित भए राजनीतिक दलका तर्फबाट नियन्त्रण गर्ने र पुनः सही मार्गमा ल्याउने क्षमता आफूहरूसँग सुरक्षित रहेको स्पष्ट पारे।
सभापति लामिछानेले सरकार अहिले नै असफल भइनसकेको र त्यस्तो अवस्था आउन नदिनेमा आफूहरू सचेत रहेको उल्लेख गरे।
सरकार सञ्चालनको प्रक्रियालाई हवाई उडानसँग तुलना गर्दै उनले कहिलेकाहीँ प्राविधिक समस्या वा वाह्य कारणले उत्पन्न हुने ‘टर्बुलेन्स’ (अवरोध) बाट नआत्तिन पनि आग्रह गरे ।
सभापति लामिछानेले आम नागरिकलाई ढुक्क रहन आग्रह गर्दै सरकारलाई सही ढङ्गले गन्तव्यमा पुर्याउने प्रतिवद्धता समेत व्यक्त गरेका छन्।
