तेहरान । इरानले आफ्नो आणविक कार्यक्रमसहित अमेरिकासँग हुने अन्तिम शान्ति सम्झौता सम्बन्धी औपचारिक वार्ता अझै सुरु नभएको दाबी गरेको छ ।

इरानका विदेश मन्त्रालयका प्रवक्ता इस्माइल बघाईले सरकारी प्रसारक आईआरआईबीसँग कुरा गर्दै अन्तिम सम्झौताका लागि आवश्यक पूर्वसर्तहरू पूरा नभएसम्म वार्ता सुरु नहुने बताएका हुन् ।

उनले भने, ‘हामी अझै अन्तिम सम्झौताका लागि हुने वार्ताको चरणमा प्रवेश गरेका छैनौं,’ उनले भने । बघाईका अनुसार समझदारीपत्र को धारा १३ अनुसार अन्तिम सम्झौतासम्बन्धी वार्ता सुरु गर्नुअघि धारा १, ४, ५, १० र ११ को कार्यान्वयन सुरु भई निरन्तर जारी रहनुपर्ने व्यवस्था छ ।

ती धाराहरूमा धारा १ मा लेबनानसहित सबै मोर्चामा युद्ध अन्त्य गर्ने कुरा उल्लेख गरिएको छ । धारा ४मा अमेरिकाले इरानी बन्दरगाहमाथिको नौसैनिक नाकाबन्दी हटाउने तथा इरानको सीमावर्ती क्षेत्रबाट आफ्ना सैन्य उपस्थिति हटाउनु पर्नेछ । धारा ५ मा स्ट्रेट अफ होर्मुज पुनः पूर्ण रूपमा सञ्चालनमा ल्याउनु पर्नेछ । धारा १० मा इरानी तेल निर्यातमाथिका प्रतिबन्ध हटाउने र धारा ११ मा विदेशमा रोक्का गरिएका इरानी सम्पत्तिहरू फुकुवा गर्ने कुरा उल्लेख छ ।

दोहामा अमेरिकी प्रतिनिधिमण्डल

यसैबीच, अमेरिकी राष्ट्रपति डोनाल्ड ट्रम्पले भने अमेरिकी वार्ताकारहरूको टोली कतारको दोहातर्फ प्रस्थान गरिरहेको जानकारी दिएका छन् । उनले उक्त बैठकलाई सायद निकै महत्वपूर्ण हुने सम्भावना रहेको बताएका छन् ।

हालै स्ट्रेट अफ होर्मुज क्षेत्रमा भएका आक्रमणले युद्धविराममा तनाव सिर्जना गरेपछि यो वार्ता हुन लागेको हो । अमेरिका र इरानबीच स्थायी शान्ति सम्झौता गर्न अगस्टको मध्यतिरसम्म समयसीमा रहेको बताइएको छ ।