काठमाडौं । इरानले शुक्रबार ओमानमा गरेको ड्रोन आक्रमणमा परी एक नेपाली घाइते भएका छन् ।

“शुक्रबार भएको आक्रमणमा नुवाकोटको ककनी निवासी एक नेपाली सामान्य घाइते भएका छन् । उनी अहिले अस्पतालमा उपचारत छन् । भोलि उनलाई डिस्चार्ज गर्ने जानकारी हामीलाई प्राप्त भएको छ,” ओमानस्थित नेपाली दूतावास स्रोतले बाह्रखरीलाई भन्यो ।

उनी आफ्नो कोठामा बसिरहेको बेला इरानी ड्रोन विस्फोट हुँदा छर्रा लागि घाइते भएका थिए । त्यसपछि उनलाई उपचारको लागि स्थानीय अस्पतालमा लगिएको थियो ।

अन्तर्राष्ट्रिय समाचार संस्थाहरूका अनुसार, ओमानको सोहर प्रान्तमा शुक्रबार इरानले प्रहार गरेको ड्रोन खस्दा दुई विदेशी कामदारको मृत्यु भएको थियो ।

ड्रोन अल–अवाही औद्योगिक क्षेत्रमा खसेको थियो । अमेरिकी लगानीमा संचालित कारखानाहरूमा इरानले हमला गर्ने गरेकाे छ ।