जेठ २३, काठमाडौं । सभामुख देवराज घिमिरेले संसद् चल्न नसक्दा विधेयकहरू अड्किएको बताएका छन् । शुक्रबार ललितपुरमा आयोजित एक कार्यशालामा सभामुख घिमिरेले विभिन्न विधेयकलाई कानुनी रूप दिन आफूहरू तल्लीन रहे पनि संसद् नै चल्न नसक्ने परिस्थिति निर्माण भएको बताए ।

उनले संसद् चल्न नसक्दा संघीय निजामती सेवा ऐन, विद्यालय शिक्षासम्बन्धी ऐनलगायत ऐन अड्किएर बसेको बताए । संसद्मा विधेयक अड्किने परिस्थिति अन्त्यका लागि सबैले भूमिका निर्वाह गर्नुपर्नेमा उनको जोड छ ।

सभामुख घिमिरेले कानुन बनाउने, कानुन कायान्वयन गर्ने संस्थालाई नियमन गर्ने र सरकारलाई प्रभावकारी बनाउने सर्वोच्च निकायलाई नियमित सञ्चालन गर्ने विधिबारे सोच्न जरुरी रहेको धारणा राखे ।

‘गाउँघरतिर एउटा उखान छ– म पछार्न न पछार्ने थिएँ, तर मलाई खुट्टै टेक्न दिएन । थुप्रै विधेयकहरूलाई कानुनको रूप दिनका लागि हामी तल्लीन छौँ, त्यो गर्न सकिन्छ र गर्छौं पनि । तर, संसद् नै चल्न नसक्ने परिस्थिति निर्माण भएको छ,’ उनले भने ।