काठमाडौं ।  अर्थमन्त्री विष्णुप्रसाद पौडेलले आगामी आर्थिक वर्षको बजेट स्रोत सुनिश्चित गरेर मात्र तयार पारिएको हुँदा कार्यान्वयनमा शंका गर्नुपर्ने अवस्था नरहेको बताएका छन्।

शनिबार नेपाल आर्थिक पत्रकार संघद्वारा आयोजित बजेटपछिको छलफल कार्यक्रममा बोल्दै उनले बजेटका सिद्धान्त र सीमाहरू पालना गरिएको दाबी गरे। “स्रोतको सुनिश्चितता गरेरै बजेट बनाइएको हो। राजस्वको लक्ष्य पनि अनुमानयोग्य आधारमा तय गरिएको छ,” मन्त्री पौडेलले भने, “बजेट कार्यान्वयनको अन्त्यमा पुग्दा प्रश्न उठ्ने स्थिति आउन दिइने छैन।”

उनले सार्वजनिक ऋणको परिमाणप्रति अनावश्यक चिन्ता नदेखाउन आग्रह गर्दै बजेटमा ऋण व्यवस्थापन सावाँब्याज भुक्तानी सुनिश्चित हुने गरी गरिएको स्पष्ट पारे। “स्रोतको विषयमा कुनै चिन्ता आवश्यक छैन। बजेटमा स्रोतको दुरुपयोग पनि हुने छैन,” उनले भने।

अर्थमन्त्री पौडेलले विगतमा ७.५ प्रतिशत आर्थिक वृद्धिदर प्राप्त भएको उल्लेख गर्दै आगामी आर्थिक वर्षमा छ प्रतिशतको आर्थिक वृद्धिदर प्राप्त गर्न सकिने विश्वास व्यक्त गरे। उनले निजी क्षेत्रको विकासमा सरकार प्रतिबद्ध रहेको भन्दै सोअनुरूप सबै पक्षमा काम भइरहेको जानकारी दिए।