जेठ १२, काठमाडौं । कैलाली भन्सार कार्यालयका प्रमुख भन्सार अधिकृत अनन्तप्रसाद तिम्सिनामाथि कुटपिट गरेको आरोपमा चार जना पक्राउ परेका छन् ।

शनिबार राति भन्सार कार्यालयको परिसरमै प्रमुख भन्सार अधिकृत तिम्सिनामाथि कुटपिट गरेको आरोपमा धनगढी उपमहानगरपालिकाका नगर प्रहरी प्रमुख लक्ष्मणसिंह धामीसहित चार जनालाई कैलाली प्रहरीले पक्राउ गरको हो ।

जिल्ला प्रहरी कार्यालय कैलालीका प्रहरी नायब उपरीक्षक (डीएसपी) राजकुमार सिंहले नगर प्रहरी निरीक्षक धामीसहित उनका सवारी चालक रतनबहादुर मल्ल, नगर प्रहरी हवल्दार मणीदत्त भट्ट र नगर प्रहरी जवान जितेन्द्रसिंह धामीलाई पक्राउ गरिएको जानकारी दिए । चारै नगर प्रहरीलाई धनगढीबाटै पक्राउ गरिएको डीएसपी सिंहले बताए ।

भन्सार कार्यालयले अभद्र व्यवहार शीर्षकमा दिएको जाहेरीका आधारमा चारै जनालाई पक्राउ गरिएको डीएसपी सिंहले बताए । नगर प्रहरी निरीक्षक धामीलाई धनगढी उपमहानगरपालिकाले पनि २४ घण्टे स्पष्टीकरण सोधेको छ ।

धनगढी–अत्तरिया ६ लेन सडकको ट्री गार्डेनमा लगाइएको जाली स्कारपियोले भत्काएको सूचनापछि शनिबार राति १० बजे नगर प्रहरी प्रमुख धामीको टोली उक्त गाडीको खोजीका लागि भन्सारको बेरियलसम्म पुगेको थियो ।