☰
काठमाडौं । रवि लामिछाने नेतृत्वको राष्ट्रिय स्वतन्त्र पार्टी (रास्वपा) लाई राजा र हिन्दु राज्य फर्काउने आन्दोलनमा सहकार्य प्रस्ताव गरिएको छ ।
संयुक्त जनआन्दोलन समितिका संयोजक नवराज सुवेदीले संवैधानिक राजसंस्था, सनातन हिन्दु अधिराज्य र बहुदलीय प्रजातन्त्र फर्काउन सहकार्यको प्रस्तावसहित पत्र लेखेका हुन् ।
गत चैत १५ गते काठमाडौंको तीनकुनेमा भएको हिंसात्मक प्रदर्शनपछि शिथिल बनेको आन्दोलनलाई उठाउन सुवेदीले रास्वपासँग सहकार्य प्रस्ताव गरेका हुन् । देशव्यापी जनआन्दोलन थाल्न लागेको जानकारी दिँदै सुवेदीले वर्तमान व्यवस्था परिवर्तन गर्नु अहिलेको ऐतिहासिक आवश्यकता रहेको जिकिर गरेका छन् ।
वर्तमान राजनीतिक व्यवस्थाले नेपाली जनताको सुशासन, समृद्धि र राष्ट्रिय पहिचानका अपेक्षा पूरा गर्न असफल भएको जिकिर संयोजक सुवेदीले गरेका छन् ।
उनले धर्म, संस्कृति र मौलिक मूल्य-मान्यतामा आधारित सनातन पहिचान गम्भीर संकटमा पर्दै गएको पनि पत्रमा उल्लेख गरेका छन् ।
सहकारी ठगी प्रकरणमा उच्च अदालत तुलसीपुरको बुटवल इजलासको गत चैत २२ गतेको आदेशपछि रास्वपा सभापति लामिछाने यतिबेला भैरहवा कारागारमा छन् ।
यस्तोमा सुवेदीले सभापति लामिछानेले पनि हालको व्यवस्थाबाट निष्पक्ष न्याय पाउन सक्नेमा शंका व्यक्त गरेको उनले स्मरण गराएका छन् ।
राज्यका प्रमुख संवैधानिक तथा न्यायिक अंगहरू दलीय हस्तक्षेप र दलीयकरणको गम्भीर शिकार बनिसकेको सन्दर्भमा रास्वपा वर्तमान व्यवस्थाबाट सन्तुष्ट नरहेको सुवेदीले निचोड निकालेका छन् ।
‘वर्तमान व्यवस्था परिवर्तन गर्नु आजको ऐतिहासिक आवश्यकता हो भन्ने कुरामा हामीबीच साझा समझदारी हुन सक्ने आशा लिएको छु,’ उनले पत्रमा भनेका छन्, ‘आउनुस्, यो चरम दलीयकरण र अव्यवस्थाको अन्त्य गरी राष्ट्रिय पहिचान, न्याय, धर्म र लोकतन्त्र पुनःस्थापित गर्ने हाम्रो साझा लक्ष्यका लागि संयुक्त रूपमा अघि बढौँ । संवैधानिक राजसंस्था, सनातन हिन्दू राष्ट्र, बहुदलीय प्रजातन्त्र पुन:र्स्थापना गरौँ ।’
