• चैत्र २२ २०८१, शनिबार

बैतडीमा जिप दुर्घटना हुँदा एकको मृत्यु, तीन जना घाइते

चैत्र २२ २०८१, शनिबार

चैत २३, काठमाडौं । बैतडीमा जिप दुर्घटना हुँदा एक जनाको मृत्यु भएको छ । देहीमाण्डौंबाट गिरेगडातर्फ जाँदै गरेको बिएसी ५६५९ नम्बरको बोलेरो जिप दशरथचन्द नगरपालिका–११ को नानीगाडमा दुर्घटनामा परेको हो ।

दुर्घटनामा परी पञ्चेश्वर गाउँपालिका–५ का ५४ वर्षीय चन्चले दयालको मृत्यु भएको बैतडीका प्रहरी प्रवक्ता, प्रहरी निरीक्षक बलराम पाण्डेयले जानकारी दिए । चन्चलेको जिल्ला अस्पतालमा उपचारका क्रममा गएराति मृत्यु भएको हो ।

दुर्घटनामा घाइते भएका पञ्चेश्वरकै ५२ वर्षीय लालीराम कोली, जिप चालक ३५ वर्षीय राकेश कोली र दशरथचन्द नगरपालिका–१० की ३० वर्षीया कविता परियारको जिल्ला अस्पतालमा उपचार भइरहेको प्रहरीले जनाएको छ ।

चालकसहित चार जना सवार जिप अनियन्त्रित भएर दुर्घटना परेको हो । जिप सडकबाट करिब ४० मिटर तल खसेको छ । घटनाबारे थप अनुसन्धान भइरहेको जिल्ला प्रहरी कार्यालय बैतडीले जनाएको छ ।