चैत्र २२,काठमाण्डौ । स्वास्थ्य तथा जनसंख्यामन्त्री प्रदीप पौडेलले अहिलेको व्यवस्था उत्कृष्ट लोकतान्त्रिक व्यवस्था भएको बताएका छन् । उनले लोकतान्त्रिक गणतन्त्रको विकल्प सुधारिएको लोकतान्त्रिक गणतन्त्र नै हुनेसमेत बताए । कांग्रेस पाल्पाले तानसेनमा शुक्रबार राखेको शुभकामना आदानप्रदान तथा स्वतन्त्र विद्यार्थी युनियनका निर्वाचित विद्यार्थीलाई बधाई ज्ञापन गर्दै मन्त्री पौडेलले केही बेथिति र समस्या भए पनि समाधान गर्न नसकिने खालको नभएको समेत बताए ।

‘केही बेथिति र समस्या होलान,’ उनले भने, ‘तर त्यो बेथिति र समस्या समाधान गर्न नै नसकिने खालका छैनन् ।’ उनले धेरै काम भएका छन् तर पूर्ण नभएको बताउँदै उनले अहिले भएका प्रयास पर्याप्त नभएको र पूर्णता नभए पनि त्यसलाई व्यवस्थित गर्न सकिने बताए । पूर्णता र व्यवस्थिततर्फ अग्रसर गराउन आवश्यक भएकाले देशलाई पछाडि फर्कने अवस्था आउन दिन नहुने उनले बताए ।

मुलुकलाई समृद्ध बनाउने सन्दर्भमा धेरै अघि बढेकोसमेत उनले बताए । ‘देशलाई समृद्ध बनाउने सन्दर्भमा हामी धेरे अघि बढिसकेका छौं,’ उनले भने, ‘अब फेरि पछाडि र विषयान्तर हुने अवस्था आउन दिन हुँदैन ।’ अब व्यक्तिको नभई विधिको शासन व्यवस्था स्थापित गर्न चाहेको उनले बताए । ‘व्यक्ति प्रधान कहिल्यै हुँदैन,’ उनले भने, ‘विधि प्रधान हुन्छ । त्यसैले विधि प्रधान हुने स्थिति बनाएका छौं ।’

संघीयता जनतालाई अधिकार दिलाउने परिष्कृत स्वरूप भएको मन्त्री पौडेलले बताए । संघीयता राज्यको क्षमता भन्दा बढी बोझिलो र खर्चिलो हुने अवस्था देखिए पनि त्यसको अर्थ संघीयता समाप्त गर्ने नभई संघीयता छरितो बनाउनुपर्नेमा उनले जोड दिए । ‘हाम्रो शासन संरचनालाई छरितो बनाएर अगाडि बढनुपर्छ,’ उनले भने । कांग्रेस केन्द्रीय सदस्यसमेत रहेका पौडेलले कांग्रेस केन्द्रीय समितिको बैठकमा प्रस्ताव गरेअनुसार अब सांसदको २ सय ७५ बाट २ सय १ मा झार्ने, संघीय मन्त्रीमण्डलको सख्या २५ बाट १५, प्रदेशमा अहिले भएको व्यवस्थामा एक तिहाई मात्र बनाउन सुझाव आफूले दिएको बताए ।

स्थानीय पालिका संख्या घटाएर वडाको संख्या बढाउनुपर्नेमा उनले जोड दिए । मन्त्री पौडेलले खर्चिलो बनेको संघीयतालाई छरितो बनाउनुपर्नेमा जोड दिए । ‘राजनीतिक संरचना छरितो बनेपछि प्रशासनिक संरचना पनि छरितो बनाउने बाटो खुल्छ,’ उनले भने, ‘सुरक्षा संरचनालाई पनि छरितो बनाउन सकिन्छ ।’ अब ‘म्यानुअल्ली’ काम कम हुने र डिजिटल हस्ताक्षर चल्ने बनाउनुपर्नेमा उनले जोड दिए । उनले प्रविधिमैत्री बनाउन सकियो भने धेरै खर्च कम हुने बताए । मन्त्री पौडेलले तानसेन महोत्सवको उद्घाटन गरेका छन् ।