चैत्र २२,काठमाडौँ । नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङले आफ्नो इमान्दार प्रयासले मुलुकमा लोडसेडिङ अन्त्य भएको बताएका छन् । शुक्रबार काठमाडौंमा पत्रकार सम्मेलन गर्दै कुलमानले दैनिक १५र१६ घण्टा लोडसेडिङ भएका बेला इमान्दार प्रयासले मात्र उज्यालो नेपालको सपना सम्भव भएको बताएका हुन् ।

त्यतिबेलाको विद्युत् आपूर्तिको अवस्था सम्झँदै कुलमानले भने, जलस्रोतको धनी देशमा करिब आठ वर्षअघिसम्म हिउँदमा १५र१६ घण्टा र बर्खामा पनि ९ घण्टा लोडसेडिङ हुनु आम विषयजस्तै थियो । लोडसेडिङ सदाका लागि बिदा गरी ‘उज्यालो नेपाल’ बनाउने अभियानसँगै घर र कार्यालय मात्र होइन, वैशाख २०७५ देखि औद्योगिक ग्राहकका लागि पनि लोडसेडिङ अन्त्य गरिएको थियो ।

उनले लोडसेडिङ अन्त्य चमत्कार नभएको पनि दोर्होयाएका छन् । लोडसेडिङ अन्त्य कुनै चमत्कार होइन, एउटा इमानदार प्रयास थियो भनेर मैले धेरैपटक भनेको छु, उनले भने । करिब ४२ प्रतिशत परिवारमा बिजुली नपुगेका बेला प्राधिकरणका लागि लोडसेडिङ अन्त्य अन्तिम अभिष्ट नभएको पनि कुलमानको भनाइ छ । यी बस्ती र बासिन्दाले बिजुलीको उज्यालोको व्यग्र प्रतीक्षा गरिरहेका थिए ।

तर, यो बीचमा ९९ प्रतिशत भन्दा बढी परिवारमा विद्युतको उज्यालो पुर्याउन प्राधिकरण सफल भएको छ । विगतमा विद्युत् सेवा माग गर्दै उपभोक्ताहरू प्राधिकरण धाउने अवस्था थियो । अहिले, अवस्था फेरिएको छ । प्राधिकरण आफैं विद्युत् नपुगेका घर खोज्दै विकट बस्तीबस्ती पुगिरहेको छ, उनले भने । त्यस्तै उनले लोडसेडिङ हटाउँदा घर–घर उज्यालो भएको र करिब ३० लाख विद्यार्थीको भविष्य सुनिश्चित भएको समेत बताए ।

आफ्नो जीवनको सबैभन्दा ठूलो सन्तुष्टि नै यही भएको उल्लेख गर्दै उनले अगाडि भने, अस्पतालका सुत्केरी वार्ड र अपरेशन थिएटरमा बत्ती ननिभ्दा सयौं नेपालीको जीवन सुरक्षामा हामी सहयोगी बन्न सक्यौं । यो मेरो जीवनको सबैभन्दा ठूलो सन्तुष्टि हो । यसले हजारौं नेपालीलाई रोजगारीका नयाँ अवसर सिर्जना गर्न आशा जगायो ।