☰
मस्को । रूसले युक्रेनसँग युद्धविराम गर्न अमेरिकाले राखेको पछिल्लो शान्ति प्रस्ताव अस्वीकार्य भनेको छ । रूसी राष्ट्रपति भ्लादिमिर पुटिनले युद्धविराम गर्न ढिलाइ गरेको भन्दै अमेरिकी राष्ट्रपति डोनाल्ड ट्रम्पले रूस माथिको आर्थिक नाकाबन्दीलाई थप कडा पार्ने धम्की दिएका बेला रूसको यस्तो प्रतिक्रिया आएको हो ।
युद्ध समाप्त गर्न रूसले राखेका केही प्रमुख मागलाई अमेरिकी प्रस्तावले सम्बोधन नगरेको पुटिनका विदेश नीति सल्लाहकार सर्गेई रियाबकोभले बताएका छन् ।
‘हामी अमेरिकीहरूले प्रस्ताव गरेको मोडल र समाधानहरूलाई धेरै गम्भीरतापूर्वक लिन्छौं तर हामी यो सबैलाई यसको वर्तमान रूपमा स्वीकार गर्न सक्दैनौं,’ रियाबकोभले रूसी मिडियालाई दिएको टिप्पणीलाई उद्धृत गर्दै पश्चिमा मिडियाले लेखेका छन् ।
रियाबकोभले अमेरिकी प्रस्तावले मुख्यतः युद्ध सुरू हुनुको मुख्य कारणलाई सम्बोधन नगरेको औंल्याए । पुटिनले बारम्बार सोभियत संघको विघटनपछि नेटोको पूर्वी युरोपमा भएको विस्तार, युक्रेनमा रूसीभाषीमाथि भएको अत्याचार, युक्रेनको नाजीकरण, युक्रेनको आन्तरिक राजनीतिमा पश्चिमाको हस्तक्षेप लगायतलाई द्वन्द्वको मूल कारण भन्दै आएका छन् ।
साथै पुटिनले युक्रेनको ऐतिहासिक रूपमा रूसदेखि अलग बेग्लै अस्तित्व नै नरहेको भन्दै युद्धका मूल कारणहरूको सम्बोधन नभई युद्धविराम नहुने बताउँदै आएका छन् ।
यसैबीच रूसले युद्ध रोक्न आनाकानी गरिरहेको ठानेर ट्रम्प रिसाएपछि पुटिनका सल्लाहकार किरिल डिमिट्रियभले यसै हप्ता अमेरिकाको भ्रमण गर्ने भएका छन् । रूसले फेब्रुअरी २०२२ मा युक्रेनमा आक्रमण गरेपछि अमेरिकाको भ्रमण गर्ने सबभन्दा वरिष्ठ रूसी अधिकारी हुनेछन् ।
रूसको सार्वभौम सम्पत्ति कोषको प्रमुख डिमिट्रियभलाई अमेरिकाले प्रतिबन्ध लगाएको छ तर उनको भ्रमणका लागि सो प्रतिबन्ध सात दिन हटाएर भिसा दिइएको भनेर अमेरिकी अनलाइन एक्सियसले लेखेको छ ।
पुटिनले युक्रेनसँग युद्धविराम गर्न ढिलाइ गरेको ठानेर ट्रम्पले भर्खरै रूसमाथिको आर्थिक नाकाबन्दीलाई थप कडा पार्ने धम्की दिएका छन् । युक्रेनसँग जारी युद्ध ३० दिन रोक्ने अमेरिकी प्रस्तावमा किभ सहमत भए पनि रूसले यो योजनालाई अस्वीकार गरेको छ ।
ऊर्जा संरचनामा हमला नगर्ने र ब्ल्याक सीमा जहाज सञ्चालन गर्न मात्रै राजी भएको रूसले भनेको छ । तर त्यसका लागि पनि अमेरिका लगायत पश्चिमा राष्ट्रले रूसको कृषि उत्पादनमा लगाएको प्रतिबन्ध हटाउनु पर्ने सर्त रुसले राखेको छ ।
