काठमाडौं । चैत १५ गते राजावादीको आन्दोलनको क्रममा कोटेश्वरको भाटभटेनी सुपरमार्केट लुटपाटको घटना नियन्त्रणमा बहादुरी देखाउने सुरक्षा गार्ड दुलप्रसाद पराजुलीलाई पुरस्कार प्रदान गरिएको छ ।

उनलाई आज एक कार्यक्रमबीच भाटभटेनी सुपरमार्केटले ५ लाख १ हजार १ सय ११ रुपियाँ र पाँच ग्रेड बढुवासहित सम्मान प्रदान गरेको हो ।
भाटभटेनी सुपरमार्केटका सञ्चालक मीनबहादुर गुरुङले आज आयोजित विशेष समारोहमा सुरक्षा गार्ड पराजुलीलाई उक्त पुरस्कार र सम्मान प्रदान गरेका हुन् ।

गत शुक्रबार राजावादीहरूको हिंसात्मक प्रर्दशनका क्रममा भएको तोडफोड तथा लुटपाटबाट ८० लाख भन्दा बढीको क्षति भएको सो कम्पनीले जनाएको छ ।

भाटभटेनीमा तोडफोड र लुटपाटमा उत्रिएकाहरुलाई सुरक्षा गार्ड पराजुलीले लाठी प्रहार गर्दै बाहिर निकालेका थिए ।