१४ चैत, काठमाडौं । बजारमा रायो सागको मूल्य बढेको छ । कालीमाटी फलफूल तथा तरकारी बजार विकास समितिले निर्धारण गरेको मूल्य सूची अनुसार आज रायो सागको थोक मूल्य बढेको हो ।

बिहीबार कालीमाटी बजारमा रायो सागको प्रतिकिलो थोक मूल्य अधिकतम ९० रुपैयाँदेखि औसत ८५ रुपैयाँसम्म तोकिएको छ । बुधबार भने रायो साग प्रतिकिलो ७५ रुपैयाँमा कारोबार भएको थियो । आज रायो सागको मूल्य १० रुपैयाँले बढेको हो ।

एक साताअघि कालीमाटी बजारमा रायोको प्रतिकिलो थोक मूल्य ४० देखि ४५ रुपैयाँमा बिक्री भइरहेको थियो । यस्तै बजारमा पालुंगो साग, चम्सुर साग र मेथीको साग प्रतिकिलो ७५ रुपैयाँमा कारोबार भइरहेको छ । तोरी सागको मूल्य भने प्रतिकिलो ४५ रुपैयाँ कायम छ ।

व्यवसायीका अनुसार अहिले बजारमा रायोको सागको आपूर्ति कम भएकाले मूल्य बढेको हो । रायोको सागको सिजन सकिन लागेकोले थोरै मात्रामा मात्रै साग बजारमा भित्रिएको उनीहरू बताउँछन् ।