बेइजिङ । चीनले घरेलु खर्च बढाउने ‘विशेष कार्य योजना’को घोषणा गरेको छ । अमेरिकी राष्ट्रपति डोनाल्ड ट्रम्पले चीनबाट आउने सामानमा अतिरिक्त भन्सार महसुल लगाएपछि यसको आर्थिक प्रभाव कम गर्न यो कदम चालिएको हो ।

आइतबार सरकारले ल्याएको यो कार्य योजनामा सर्वसाधारणको आय बढाउनेदेखि शिशु स्याहार सहुलियत प्रणाली स्थापित गर्नेसम्मका व्यापक योजना छन् ।

यसमा पुराना कार र विद्युतीय सामान लिएर नयाँ दिने योजना पनि छ । यही महिनाको सुरुमा प्रधानमन्त्री ली खछ्याङले प्रमुख राजनीतिक बैठकमा गरेको वाचाका आधारमा यो योजना तयार पारिएको हो ।

लीले यो वर्षका लागि ५ प्रतिशतको आर्थिक वृद्धिको महत्वाकाङ्क्षी लक्ष्य तय गरेका छन् । सुस्ताइरहेको अर्थतन्त्रलाई निर्यातमा भर नपरी घरेलु खपतले नै उकास्न सकिन्छ भन्ने सुनिश्चित गर्न सकियो भने मात्रै यो सम्भव हुनेछ ।

घरेलु स्तरमा कमजोर उपभोक्ता खर्च, घरजग्गा बजारमा लामो समयदेखि व्याप्त मन्दी आदि कारणले गर्दा चीनको अर्थतन्त्र सुस्ताइरहेको छ ।

ट्रम्पले चीनसँग व्यापार युद्धको घोषणा गरेपछि चिनियाँ आर्थिक गतिविधि झनै खुम्चिएको छ । गएको महिना ट्रम्पले चीनबाट आउने हरेक सामानमा २० प्रतिशत भन्सार महसुल लगाएका थिए ।