काठमाडौं । जनमत पार्टीको केन्द्रीय समिति बैठकमा विवाद देखिएको छ । महोत्तरीको बर्दिवासमा सुरु भएको बैठक उपाध्यक्ष दीपक साहले बहिष्कार गरेका छन् ।

कोषाध्यक्ष सुरेन्द्रनारायण यादवलाई कारबाही गरेपछि विवाद छताछुल्ल भएको थियो । त्यही विवादपछि भएको केन्द्रीय समिति बैठकमा पदाधिकारीले नै बहिष्कार गरेका हुन् ।

कोषाध्यक्ष यादवसहित साह पनि राउतले कारबाही गरेको सूचीमा रहेका थिए । यादव र साहलाई पार्टीले स्पष्टीकरण सोधेको थियो । स्पष्टीकरण बुझाउन नपाउँदै साहलाई अनुशासन समितिको संयोजकबाट हटाइएको थियो । त्यसरी हटाएपछि असन्तुष्ट साहले बैठक बहिष्कार गरेको बताइएको छ ।

सुरुमा पार्टी बनाउन सहयोग गर्ने नेताहरूलाई नै कारबाही गरी राउतले समस्या सिर्जना गरेको साहको तर्क थियो । त्यसले गर्दा राउत पनि साहसँग असन्तुष्ट रहेका थिए । उपाध्यक्ष वसन्त कुशवाह अध्यक्ष राउतप्रति असन्तुष्ट छन् ।

यता केन्द्रीय सदस्य शम्भु साहलाई पनि स्पष्टीकरण सोधिएको छ । यसअघि सचिव बीपी साहलाई पनि पार्टीबाट निलम्बन गरिएको थियो ।

साथै, अध्यक्ष राउतले सचिवद्वय अनिता साह र भुपेन्द्र यादवलाई पनि स्पष्टीकरण सोधेका थिए । राउतले यसअघि कैलाश महतो, जासर यादव, रवीन्द्र यादवजस्ता नेताहरूलाई पनि कारबाही गरेका थिए ।