☰
काठमाडौँ । समाजवादी मोर्चामा आबद्ध दलहरूले सुखानी बलिदान दिवसको अवसरमा अग्रगमनको यात्रालाई समाजवादसम्म पुर्याउन जस्तोसुकै मूल्य चुकाउन परे पनि तयार रहेको प्रतिबद्धता जनाएका छन् ।
नेकपा(माओवादी केन्द्र)का झापा जिल्लाका इन्चार्ज रञ्जित तामाङ, एकीकृत समाजवादीका जिल्ला अध्यक्ष वेदराज रेग्मी, नेपाल कम्युनिस्ट पार्टीका जिल्ला इन्चार्ज सुमनसिंहले बुधवार संयुक्त विज्ञप्ति जारी गर्दै प्रतिबद्धता जनाएका हुन् ।
२०२९ साल फागुन २१ गते तत्कालीन पञ्चायती शासकद्वारा झापा किसान आन्दोलनका पाँच जनालाई जेल सार्ने बाहानमा सुखानी जङ्गलमा लगेर गोली हानी हत्या गरेको थियो ।
कम्युनिस्ट पार्टीको नाममा कम्युनिस्ट आन्दोलनलाई नै भ्रमित गर्ने गरिएका पश्चगामी कदमहरू भइरहेको, नयाँको नाममा भ्रमित गर्ने प्रवृत्ति र जनताले अस्वीकृत गरिसकेको साथै इतिहास बनिसकेको राजतन्त्र फर्काउन खोज्ने प्रवृत्ति देशलाई दुर्घटनामा लैजाने प्रवृत्ति भएको विज्ञप्तिमा उल्लेख छ ।
माओवादीले २०२९ साल फागुन २१ गते सुखानी हत्याकाण्डका सहिद रामनाथ दाहाल, विरेन राजवंशी, कृष्ण कुइँकेल, नारायण श्रेष्ठ र २०५२ साल फागुन १४ गते हत्या भएका माओवादी जनयुद्धका पहिलो सहिद दिलबहादुर रम्तेलको सम्झनामा हरेक वर्ष सहिद सप्ताह बनाउँदै आएको छ ।
यता झापा विद्रोहमा सहभागी भएका नेकपा एमाले, एकीकृत समाजवादी, नेकपा माले लगायत दलहरूले सुखानी हत्याकाण्डलाई बलिदान दिवसको रूपमा हरेक वर्ष मनाउँदै आएको छ ।
