काठमाडौं । अब आइफोनको लक स्क्रिनबाटै गुगलको जेमिनाई एआई च्याबटसँग कुराकानी गर्न सकिने भएको छ । गुगल जेमिनाईले आईओएस एपमा सोमबार सार्वजनिक गरेको अपडेटमा यस्तो सुविधा थपिएको हो ।

यससँगै लक स्क्रिनमा विजेट थपेर प्रयोगकर्ताले जेमिनाईसँग लाइभ कुराकानी गर्न सक्नेछन् । गुगलको जेमिनाईले हालैका घटनाक्रमको जानकारी पनि लाइभ दिन सक्छ ।

एप्पलको एआई इनेब्ल्ड असिस्टेन्ट सिरी सन् २०२७ सम्म आउने भनिएका बेला गुगलले एलएलएममा आधारित भ्वाइस असिस्टेन्ट जेमिनाईबाटै आईफोन प्रयोगकर्तालाई सुविधा दिन थालेको हो ।

तर, एलएलएमबाट सञ्चालित एप्पलको सिरीले तेस्रो पक्षका असिस्टेन्टको तुलनामा आइफोनमा निकै धेरै कुरा गर्न मद्दत गर्छ ।

च्याट जीपीटीको आईओएस एपले पनि आईफोन प्रयोगकर्तालाई लाइभ भ्वाइस कुराकानीको सेवा दिएको छ ।