काठमाडौं । अमेरिकामा डोनाल्ड ट्रम्पको प्रशासनले न्याय मन्त्रालयका १२ अधिकारीलाई बर्खास्त गरेको छ । यी अधिकारीहरूले ट्रम्प विरुद्ध अनुसन्धान गरेका थिए ।

बीबीसीको अमेरिकी साझेदार सीबीएसका अनुसार कार्यवाहक महान्यायाधिवक्ता जेम्स म्याकहेनरीले यी अधिकारीहरूलाई बर्खास्त गर्ने निर्णय गरेको न्याय मन्त्रालयका एक अधिकारीले बताए ।

यी अधिकारीहरूले राष्ट्रपति ट्रम्पको एजेन्डा पूर्ण इमानदारीका साथ कार्यान्वयन गर्न सक्षम हुनेछन् भन्ने उनलाई नलागेको बताइएको छ ।

यसैबिच, ट्रम्पले थप तीन कार्यकारी आदेशमा हस्ताक्षर गर्ने सम्भावना छ । यी आदेशहरू सेनामा ट्रान्सजेन्डरहरूको भर्ती, कोभिड खोप लिन अस्वीकार गर्ने सैनिकहरूको पुनर्बहाली, र विविधता, समानता र समावेशी योजनासँग सम्बन्धित छन् ।