☰
काठमाडौं । नेपाल मगर संघको आयोजनामा आज माघे सकराती पर्वको अवसरमा काठमाडौंको टुडिखेलमा शुभकामना आदन प्रदान तथा साँस्कृतिक कार्यक्रम सम्पन्न भएको छ ।
नेपाल मगर संघका अध्यक्ष ज्ञानेन्द्र पुनको अध्यक्षतामा भएको सो कार्यक्रममा देशका विभिन्न जिल्लाबाट सहभागी भएका मगर समुदायको संस्कृतिमा आधारित झाँकी तथा र्यालीहरु प्रदर्शन गरिएका थिए । माघीको अवसर भएकोले टुंडिखेलमा मगर समुदायले उत्पादन गरेका विभिन्न स्थानीय खानाका परिकारहरु पनि प्रदर्शन तथा विक्रीमा राखिएका थिए ।
सो अवसरमा गण्डकी प्रदेशमा प्रचलित कौरा नाच, थाली नाच तथा विभिन्न क्लबहरुबाट सहभागी कलाकारहरुले विभिन्न नृत्यहरु प्रदर्शन गरेका थिए ।
सोही अवसरमा नेपाल सरकारका संचारमन्त्री तथा प्रवक्ता पृथ्वीसुब्बा गुरुङले नेपालका मगर समुदायको इतिहास समेटेर प्रकाशन गरिएका ३ वटा पुस्तकहरुको एकसाथ विमोचन गरेकाथिए ।
आजको माघी मेला तथा साँस्कृतिक कार्यक्रम प्रथम सहिद लखन थापा संग्रहालयप्रति समर्पित रहेको आयोजकले जनाएको छ । सोही कार्यक्रममा एक समारोहका बीच नाट्य सम्राट तथा संस्कृतिविद भैरवबहादुर थापालाई सम्मान पनि गरिएको छ ।
सोही अवसरमा नेपाल आदिवासी जनजाति महासंघका अध्यक्ष ग्याल्जेन लामाले आफ्नो संस्थाको तर्फबाट प्रथम सहिद लखन साँस्कृतिक संग्रहालयको भवन निर्माणको लागि रु. १ लाख ११ हजार ११ रुपैयाँ आर्थिक सहयोग गर्ने घोषणा गरेका थिए ।
त्यस्तै सोही भवन निर्माणार्थ निर्मल सारुले पनि रु. ५१ हजार आर्थिक सहयोग गर्ने घोषणा गरेका थिए । आजको कार्यक्रमको संचालन नेपाल मगर संघका महासचिव टेक नाम्जाली मगरले गरेका थिए । माघी पर्व मगर समुदायको प्रमुख साँस्कृतिक पर्व हो ।
सो अवसरमा अन्तराष्ट्रिय मगर संघका अध्यक्ष नवीन रोकामगरले इन्द्रेणीले विभिन्न रंगहरु दिएजस्तै विभिन्न जातजातिहरुका कारण नेपाल पनि रंगीन भएको बताए । साथै उनले माघी पर्व चेली, प्रकृति र पितृ पुज्ने पर्व भएको भन्दै यो पर्व नयाँ वर्ष भएको पनि बताए ।
मगरहरु आफ्नो पहिचान र सभ्यतासहित बाँच्न चाहेको जाति भएको भन्दै आफूहरुले मगरातसहितको गणतन्त्र माग गरेको बताए । उनले मगरात साझा इतिहास भएको भन्दै पूर्खाको नासो मगर संस्कार जोगाउनु अहिलेको पुस्ताको जिम्मेवारी भएकोमा जोड दिए ।
मगरात स्वायत्त प्रदेश बनाउनु पर्ने रोकाको माग छ । आक्रोसित मुद्रामा मन्तव्य राखेका रोकामगरले सरकारले नै मगरहरुलाई विभाजन गरेको आरोप पनि लगाए । आक्रोसित हुँदै उनले भने,‘मगर जातिको इतिहासलाई थरमा सिमित गरिदिने नेपाल सरकारको तथ्यांक विभागप्रति मुर्दावाद भन्न चाहन्छु’ ।
सो अवसरमा विशिष्ट अतिथिको आसनबाट मन्तव्य राख्दै जनजाति नेता महेन्द्र थापाले माघी अरु जातिले पनि मनाउँछन् तर माघी मगरको मुख्य साँस्कृतिक पर्व भएको बताए । उनले नेपाल आफ्ना पूर्खाले रगत बगाएर बनाएको देश भएपनि आफूहरु आज शरणार्थी जस्तै बनाइएको गुनासो पोखे ।
कार्यक्रमका अर्का वक्ता तथा नेपाल आदिवासी जनजाति महासंघका अध्यक्ष ग्याल्जेन लामाले ‘आमालाई पल्ला घरे साइँलाले मँ त ढलेँ ढलेँ भने झैं सरकारको पनि यस्तै हालत भएको भन्दै व्यङ्ग्य गरे । सरकारले जनतालाई रोजगारी दिनुपर्नेमा काम गर्न खोज्नेलाई पनि खुट्टा तान्ने प्रवृति बढेको बताए । उनले यति ठुलो समारोहमा मगर भाषामा एउटा पनि गीत र नृत्य देख्न नपाउनु दुर्भाग्य भएको बताए ।
सोही अवसरमा बोल्दै नेपाली कांग्रेसकी सांसद कुसुम थापाले जनजातिले जोगाएर ल्याएको पर्यावरण बिग्रँदै गएकोले यसको रक्षाको लागि नेपाल मगर संघ जस्ता संघसंस्थाहरुले पहल गर्नुमा जोड दिइन् ।
सो अवसरमा मगर खेलकुद संघ लगायतका खेलाडीले तेक्वान्दो लगायतका खेलकुद प्रस्तुत गरेका थिए । सभाध्यक्ष ज्ञानेन्द्र पुनले कार्यक्रमको समापन गरेका थिए ।
