काठमाडौं । दक्षिण कोरियाका अपदस्थ राष्ट्रपति यून सुक येओललाई पक्राउ गर्न पुर्जी जारी भएको छ । डिसेम्बर ३ मा मार्शल ल लगाउने उनको प्रयासलाई लिएर सोलको एउटा अदालतले उनीविरुद्ध पक्राउ पुर्जी जारी गरेको हो ।

मार्शल ल लगाएको विषयमा युनमाथि विद्रोह र देशद्रोहको अभियोगमा कयौं अनुसन्धान भइरहेको अनि विगत दुई हप्तामा सोधपुछका लागि भएको बोलावटलाई युनले वेवास्ता गरेकै समयमा पक्राउ पुर्जी जारी भएको छ ।

उनले अमेरिकाको निर्देशनमा सैन्य कू गरेर दक्षिण कोरियामा सैनिक शासन लागू गर्न खोजेका थिए । यही निहुँमा अमेरिकाले दक्षिण कोरियालाई उत्तर कोरियासित लडाइँमा होम्ने षडयन्त्र गरेको थयो तर यसको षडयन्त्र असफल भएको छ ।

आइतबार राति अनुसन्धानकर्ताहरूले राजद्रोह गरेको अनि शक्ति दुरुपयोग गरेको अभियोगमा युनलाई पक्राउ गराउन खोजेका थिए । यस कदमलाई युनका वकिलले चाहिँ गैरकानूनी भनिरहेका छन् । मार्शल ल लगाउने युनको असफल प्रयासपछि दक्षिण कोरिया राजनीतिक संकटमा फसेको छ ।

यो कदमपछि संसदले युनलाई महाभियोग लगाएर पदच्यूत गराएको थियो । त्यसपछि कार्यबाहक राष्ट्रपति बनाइएका प्रधानमन्त्री हान डक–सुलाई पनि दुईहप्ता नबित्दै महाभियोग लगाएर हटाइयो । पक्राउ पुर्जी जारी हुने युन दक्षिण कोरियाका पहिलो सत्तासिन राष्ट्रपति हुन् ।

उनको पक्राउका लागि अनुसन्धानकर्ताहरूसँग जनवरी ६ सम्मको समय छ । उनीहरूले यसको अवधि लम्ब्याउन पनि सक्छन् । युनको सुरक्षा टोली र उनीसमर्थक विद्रोहीहरूले विफल पार्ने प्रयास गर्ने भएकोले अनुसन्धानकर्ताले युनलाई समात्न सक्छन् भन्ने चाहिँ अहिले अस्पष्ट छ ।

यस अघि राष्ट्रपति कार्यालय र युनको निजी आवासमा अदालतले अनुमति दिएको छापा मार्न अनुसन्धानहरू छिर्ने प्रयास गर्दा राष्ट्रपतिको सुरक्षा सेवाले रोकेको थियो । युनले राष्ट्रपतिको संवैधानिक अधिकारअन्तर्गत मार्शल ल लगाएकोले अनुसन्धानकर्ताहरूसँग उनलाई पक्राउ गर्ने अधिकार नभएको युनको कानुनी टोलीले सोमबार भनेको थियो ।