पुस २, काठमाडौं । मस्कोमा विद्युतीय स्कुटरमा लुकाइएको बम विस्फोटमा परी आणविक सुरक्षा बलका एक जना वरिष्ठ जनरलको मृत्यु भएको रुसको अनुसन्धान समितिले जनाएको छ ।

रेडियोलोजिकल, केमिकल एन्ड बायोलोजिकल डिफेन्स (आरसीएचबीडी) का सेनाका प्रमुख लेफ्टिनेन्ट जनरल इगोर किरिलोभको मंगलबार रियाजान्स्की प्रोस्पेक्टको अपार्टमेन्ट भवनबाहिर हत्या भएको हो ।

‘रुसी सशस्त्र बलको विकिरण, रासायनिक र जैविक सुरक्षा बलका प्रमुख इगोर किरिलोभ र उहाँका सहायक मारिएका छन्,’ अनुसन्धान समितिले भनेको छ ।

रुसी टेलिग्राम च्यानलहरूमा पोस्ट गरिएका तस्वीरहरूमा भवनको प्रवेशद्वार रगतले लतपतिएको र भुईंमा दुईवटा शव देखिएका छन् । घटनास्थलमा प्रहरीले घेरा हालेको छ ।

किरिलोभको नेतृत्वमा रुसले करिब ५ हजारपटक रासायनिक हतियार प्रयोग गरेको दाबी गरिन्छ । आक्रमण कसले गरेको हो भन्ने खुलेको छैन । रुस र युक्रेनबीच युद्ध चलिरहेको छ ।