नेपालगंज, मंसिर २३ । विश्वभर जारी द्वन्द्व, हिंसा, र नरसंहारका विरुद्ध शान्तिको सन्देश फैलाउन तथा फिलिस्तीनमा मारिएका महिला, बालबालिका, र पत्रकारहरूको सम्झनामा नेपालगंजको जडीबुटी संघको कार्यालयमा विशेष कार्यक्रम सम्पन्न भएको छ।

कार्यक्रमको अध्यक्षता नरैनापुर गाउँपालिकाका प्रमुख सैय्यद मोहम्मद इस्तियाक अहमद शाहले गरे । कार्यक्रम मंसिर २२ गते सम्पन्न भएकाे हाे । कार्यक्रममा प्रमुख अतिथिका रूपमा लुम्बिनी प्रदेशकी सांसद मीना बोहरा सिद्दीकी उपस्थित थिइन्। अन्य विशिष्ट अतिथिहरूमा नेपाली कांग्रेसका पूर्व जिल्ला सदस्य पूर्णसिंह ठकुरी, मौलाना सगीर खान र पूर्व प्रदेश सांसद तथा जडीबुटी संघका अध्यक्ष याकुब अंसारी सहभागी थिए ।

कार्यक्रमको सुरुआत कारी मोहम्मद सगीरले कुरआनपाकको तिलावत गरेर गरिएको थियो। त्यसपछि नातिया कलाम प्रस्तुत गर्दै अबूसहमाले कार्यक्रममा भावनात्मक सन्देश थपे ।

तत्पश्चात, विभिन्न वक्ताहरूले आ-आफ्ना विचार राखेका थिए। भेरी एफ.एमका प्रमुख मोहम्मद आरिफ अंसारी, इको नेपाल फाउन्डेशनका संस्थापक अध्यक्ष करण साहु, नेपाली मुस्लिम शान्ति समाजका अध्यक्ष नूर मोहम्मद अंसारी, सदका ए पंजतनपाकका अध्यक्ष तथा पूर्व नेपाल हज समितिका सदस्य मेराज अहमद हिमालय, र अधिकारकर्मी शाहिदा शाहले फिलिस्तीनमा भइरहेको नरसंहार तत्काल रोक्न र विश्वभर शान्ति कायम गर्न आह्वान गरे।

कार्यक्रमको अन्त्यतिर, सैय्यद अशफाक रसूल हाशमीले आफ्ना रचनामार्फत शान्तिको लागि प्रार्थना गरे । सहभागीहरूले फिलिस्तीनका शहीदहरू र तिनका परिवारको सम्झनामा प्रार्थना गर्दै कार्यक्रम समापन गरेका थिए  ।

यस विशेष कार्यक्रमले विश्व शान्ति, मानवताको रक्षा, र द्वन्द्व समाधानका लागि महत्वपूर्ण सन्देश प्रवाह गरेको कार्यक्रमका संचालक जैनुल आबेदीनले बताएका छन्।