काठमाडौँ — संस्कृत, कृषि तथा वन विज्ञान र पोखरा विश्वविद्यालयको उपकुलपति बन्न ३१ जना प्राध्यापकले छनोट तथा सिफारिस समितिसमक्ष आवेदन दिएका छन् । कुलपति कार्यालयले उपकुलपति नियुक्तिका लागि समिति गठन गरी प्रतिस्पर्धाको आधारमा नियुक्तिसम्बन्धी कार्यविधि जारी गरि आवेदन माग गरेको थियो । त्यसका लागि छुट्टाछुट्टै समिति समेत गठन भएको छ ।

संस्कृत विश्वविद्यालयको उपकुलपति बन्न विरेन्द्र कुमार लाल, भागवत ढकाल, गुरुप्रसाद सुवेदी, भीमप्रसाद खतिवडा, लेखप्रसाद निरौला, ऋषिराम रेग्मी, धनेश्वर नेपाल, कृष्णकान्त पराजुली, शान्तिकृष्ण अधिकारी, जयन्त आचार्य, लालमणि पाण्डे, कार्तिकेय झा र नवराज कट्टेल सहित १३ जनाको आवेदन परेको सिफारिस तथा छनोट समितिले जनाएको छ । त्यस्तै कृषि तथा वन विज्ञान विश्वविद्यालयको उपकुलपतिका लागि अर्जन कुमार श्रेष्ठ, कल्याणी मिश्र त्रिपाठी, पुस्करबहादुर पाल, बलराम कुमार भट्ट, शारदा थपलिया र होमबहादुर बस्नेत सहित ६ जनाको आवेदन परेको छ ।

त्यस्तै पोखरा विश्वविद्यालयको उपकुलपति बन्न १२ जनाको आवेदन परेको समितिले जनाएको छ । बेदराज केसी, दीपकबहादुर भण्डारी, ज्ञानेश्वर शर्मा, विश्वराज अधिकारी, केदारनाथ घिमिरे, पुष्पराज शर्मा, सरोज कोइराला, निर्मला जम्मरकट्टेल, विष्णुराज तिवारी, विनयकुमार मिश्र, टेकराज ज्ञवाली र दीपकराज पौडेलले आवेदन दिएको समितिले जनाएको छ । समितिले आवेदकहरूको सोचपत्र र कार्ययोजनाको प्रस्तुतीकरणसहित अन्तर्वार्ताको मिति तोकेर नियुक्ति प्रक्रिया अघि बढाएका छन् ।

सिफारिस समितिले ३÷३ जनाको नाम सिफारिस गर्ने र कुलपति तथा प्रधानमन्त्रीले तीमध्ये १÷१ जनालाई विश्वविद्यालयमा नियुक्ति दिने व्यवस्था छ । यी विश्वविद्यालयमा प्रतिस्पर्धामा उपकुलपति छनोटका लागि जारी भएका कार्यविधिमा तजबिजको आधारमा समितिले दिने अंक बढी राखिएको भन्दै आलोचना हुँदै आएको छ । यी विश्वविद्यालयको उपकुलपति नियुक्तिमा एक सय पूर्णाङकमा हुने प्रतिस्पर्धामा सबैभन्दा बढि २५ अंक अन्तरवार्तामा राखिएको छ । समितिले आफूअनुकूल उम्मेदवारलाई अन्तर्वार्तामा बढी अंक दिएर उपकुलपति सिफारिस गर्ने भन्दै प्राध्यापकले असन्तुष्टि जनाउँदै आएका छन् । यसअघि मध्यपश्चिम विश्वविद्यालयको उपकुलपति छनोटमा सबैभन्दा बढी अंक अनुसन्धानतर्फ राखिएको थियो ।