घाँस काट्न जादाँ सम्पर्कविहीन भएकी बारपाक सुलिकोट गाउँपालिका–१ की १८ बर्षीय सुचिना घले मृत अवस्थामा फेला परेकी छन् । मंगलवार दिउँसो साढे एक बजे मैखर्क जंगलमा खाल्डोमा पुरिएको अवस्थामा उनको शव फेला परेको जिल्ला प्रहरी कार्यालय गोरखाले जनाएको छ ।

गत शनिवार घाँस काट्न भनी उनी घर नजिकैको जंगलमा गएकी थिइन् । साँझसम्म पनि घर नफर्केपछि स्थानीय र आफन्त खोजी कार्यमा जुटेका थिए । खोजी गरिदिन भन्दै उनीहरुले बारपाक प्रहरी चौकीमा समेत निवेदन दिए । प्रहरी र स्थानीय मिलेर खोजतलास गर्ने क्रममा मंगलवार जंगल नजिकै ती युवतीको शव फेला परेको एसपी वासुदेव पाठकले बताए ।

घटनाको अनुसन्धानका लागि गण्डकी प्रदेश प्रहरी कार्यालय पोखराबाट तालिम प्राप्त कुकुरसहितको बिशेषज्ञ टोली र जिल्ला प्रहरी कार्यालयबाट डिएसपी इन्द्रप्रसाद सुवेदी नेतृत्वको टोली घटनास्थल पुगिसकेको छ । धार्चे ६ काशिगाउँ माइत भएकी घलेको शव माइती पक्ष आएपछि मात्र निकालिने एसपी पाठकले जानकारी दिए । ‘धार्चेको काशिगाउँबाट माइती पक्ष आउँदै हुनुहुन्छ, उहाँहरु आएपछि मात्र शव निकाल्छौँ,’ उनले भने ।

युवतीको हत्या भएको स्थानीयले दावी गरेका छन् । डोकोभित्र राखेर स्याउलाले पुरेको अवस्थामा शव देखिएको र टाउकोमा धारिलो हतियार प्रहार भएको चोट समेत रहेको स्थानीयले बताएका छन् । घटनास्थल नजिकै केही कपाल, रगत र डोको भेटिएको प्रहरीले समेत जनाएको छ । घटना शंकास्पद भएकाले हत्या पनि हुन सक्ने प्रहरीको अनुमान छ ।