काठमाडौँ । गृहमन्त्री रमेश लेखकले महोत्तरीका प्रमुख जिल्ला अधिकारी लालबाबु कवारी र पर्साका प्रमुख जिल्ला अधिकारी गणेश अर्याललाई स्पष्टीकरण सोधेका छन् । मन्त्रालयमा बोलाएर उनीहरूलाई स्पष्टीकरण सोधेका हुन् ।

मंसिर ७ मा अख्तियारले जिल्ला प्रशासन कार्यालयका नासु अशोककुमार यादवलाई २० हजार घुससहित पक्राउ गरेको थियो । मन्त्री लेखकले सीडीओ कवारीलाई त्यसबारे सोधपुछ गर्दै आफ्नै कार्यालयको कर्मचारीलाई ‘अनुशासन’मा राख्न नसकेको भन्दै असन्तोष व्यक्त गरेका हुन् । लेखकले प्रशासन चुस्ता राख्न सीडीओ कवारीलाई निर्देशन दिएको गृह मन्त्रालयका एकजना अधिकृतले रातोपाटीलाई बताए ।

पर्साका प्रमुख जिल्ला अधिकारीले दिएको ‘अभिव्यक्ति’बारे मन्त्री लेखकले उनलाई सचेत गरेका छन् । कार्तिक ३० मा पर्साका सीडीओ अर्यालले अस्पतालमा आगो लगाउने अभिव्यक्ति दिएका थिए । मन्त्री लेखकले अर्याललाई त्यस्तो अभिव्यक्ति नदिन सचेत गराएका हुन् ।