‘पूर्णबहादुरको सारंगी’ प्रदर्शनको दिनदेखि उकालो लाग्दै नेपाली फिल्म जगतमा कायम रेकर्डलाई माथ गरिरहेको छ । यसले आफैमा नयाँ रेकर्ड पनि बनाएको छ । संग्रामपुर उपन्याससँग मिलेको भनिए पनि यसको आधिकारिकता बाहिर आएको छैन ।

पूर्णबहादुरको सारङ्गीले अहिले ३ हप्ताको समय पारगरिरहेको छ । यो फिल्म चलेको १७औं दिनसम्म ३४ करोड ३६ लाख ग्रस कमाइ गरेको जानकारी सार्वजनिक भएको छ । वितरक कम्पनी ब्यांकटेस इन्टरटेनमेन्टले शनिबारसम्मको कलेक्सन रिपोर्ट सार्वजनिक गर्दा यो आँकडा बाहिर आएको हो ।

यो फिल्मले प्रत्येक दिन २ करोड माथिको अनुपातमा कमाइ गरिरहेको छ । यो फिल्मले सर्वाधिक कलेक्सनको रूपमा इतिहास रचेको छ । सर्वाधिक ‘शो’ पाउने फिल्ममा पनि यो दर्ज भएको छ । आश्चर्यको कुरा त के छ भने ‘पूर्णबहादुरको सारङ्गी’ ले एकैदिनमा सर्वाधिक कमाइ गरेर रेकर्डसमेत कायम गरेको छ ।

उक्त फिल्मले कात्तिक २४ गते एकैदिनको शोमा समेत ३ करोड ८९ लाख रुपैयाँ ग्रस कमाइ गरेर चकित पारेको छ । यसले ‘कबड्डी ४’ को २ करोड ९० लाखको ग्रस कमाइलाई उछिनेको छ ।