२७ कात्तिक, काठमाडौँ । एक खाजा घरमा काम गर्दै आएका १४ वर्षीय बालकको उद्धार गरिएको छ । काठमाडौँ महानगरपालिकाको बाल उद्धार कार्यदलले काठमाडौँ महानगरपालिका–१ स्थित हात्तिसारमा रहेको आईएस मःम एण्ड खाजा घरमा जोखिमपूर्ण अवस्थामा काम गर्दै आएका बालकको उद्धार गरिएको हो ।

काठमाडौँ महानगरपालिका, बागमती श्रम तथा रोजगार कार्यालय, बालबालिका खोजतलास सेवा (१०४) सहितको संयुक्त टोलीले उद्धार गरेको हो ।

उद्धार पश्चात् ती बालकलाई अस्थायी संरक्षण गृहमा राखिएको छ । उनलाई मनोविमर्श स्वास्थ्य उपचार लगायतका सेवा समेत प्रदान गरिएको हो ।

काठमाडौँ महानगरको प्रमुखको सचिवालय सदस्य धिरज जोशीले एकदम दयनीय अवस्थामा रहेका ती बालकको उद्धार गरिएको बताए ।

बिहानदेखि रातिसम्म काममा लगाउने, त्यसरी काम गराएवापत कुनै पारिश्रमिक नदिने, राति भुईँमै सुत्ने जस्तो अमानवीय व्यवहार देखिएपछि उद्धार गरिएको उनले बताए ।

काठमाडौँ महानगरपालिकाले हालसम्म २५ बालक र २७ बालिका गरी कुल ५२ जना बालबालिकाको उद्धार गरेको छ । महानगरले दोस्रो चरणको बाल उद्धार कार्य सुरु गरेसँगै ती बालकको उद्धार गरिएको हो ।

महानगरपालिकाले पहिलो चरणमा उद्धार भएका सबै बालबालिकाको घटना व्यवस्थापन कार्य सकाएपछि दोस्रो चरणको बाल उद्धार कार्य सुरु गरेको हो ।