☰
कात्तिक २१, काठमाडौं । आईसीसी महिला यू–१९ विश्वकपको एसिया छनोटमा नेपालले विजयी सुरुआत गरेको छ ।
बुधबार युनाइटेड अरब इमिरेट्स (यूएई) को द सेभेन रंगशालामा सम्पन्न आफ्नो पहिलो खेलमा नेपालले थाइल्यान्डविरुद्ध ६७ रनको सहज जित निकालेको हो ।
नेपालले प्रस्तुत गरेको १०३ रनको लक्ष्य पछ्याएको थाइल्यान्ड ११.४ ओभरमा ३५ रनमै समेटियो ।
थाइल्यान्डका लागि अपिसरा सुवान्चोरथीले १३ रन बनाइन् । यसबाहेक, अन्य ब्याटरले दोहोरो अंकमा रन जोड्न सकेनन् ।
नेपालका लागि रचनाकुमारी चौधरीले चार विकेट लिइन् । यस्तै, कप्तान पूजा महतो र रिया शर्माले समान दुई विकेट लिए । करिस्मा गुरुङ र मनिषाकुमारी उपाध्यायको नाममा समान एक विकेट रह्यो ।
त्यसअघि टस हारेर ब्याटिङको निम्तो पाएको नेपालले निर्धारित २० ओभरमा ६ विकेट गुमाउँदै १०२ रनको योगफल तयार पारेको थियो ।
नेपालका लागि पूजा महतोले ४० बलमा तीन चौका र एक छक्काको मद्दतले सर्वाधिक ३५ रन बनाइन् । यसैगरी, सीमाना केसीले अविजित १९ र सोनी पाख्रिनले १९ रन बनाइन् ।
थाइल्यान्डका लागि चारुकन साइमाले दुई र सुनिसा बोङ्कोडफोंगम्पाईले एक विकेट लिए ।
