इजरायली प्रधानमन्त्री बेन्जामिन नेतान्याहुले इरानलाई चेतावनी दिँदै आफ्नो देश जहाँसुकै पसेर आक्रमण गर्न सक्षम रहेको बताएका छन् । समाचार संस्था टाइम्स अफ इजरायलका अनुसार, हिजबुल्लाहका महासचिव हसन नसरल्लाह मारिएको घटनामा इरानलाई धेरै उत्तेजित नहुन चेतावनी दिँदै नेतान्याहुले यस्तो बताएका हुन् ।

हिजबुल्लाह इरानले नै स्थापना गरेको लेबनानी राजनीतिक–सशस्त्र संगठन हो भने नसरल्लाह इरानका विश्वासपात्र मानिन्थे । हिजबुल्लाहको गोप्य भनिएको कार्यालयमा युद्धक विमानबाट इजरायलले गरेको आक्रमणमा नसरल्लाह मारिएका थिए । त्यसपछि समेत इजरायलले युद्धक विमानमार्फत आक्रमण जारी राखेको छ ।

इरानसँग पनि इजरायलको दुश्मनी छ । केही महिनाअघि दुई देशबीच तनाव बढेको थियो । यसअघि इरानकै राजधानी तेहरानमा हमास प्रमुख इस्माइल हानियाको हत्या र अहिले आफूले हुर्काएको समूहका प्रमुख मारिएको घटनाले इरानलाई समेत विक्षिप्त बनाएको बताइन्छ । यस्तोमा निहुँ खोज्ने आए इरानमा समेत आक्रमण गर्न सक्ने आशयमा इजरायली प्रधानमन्त्रीले चेतावनी दिएका हुन् ।