काठमाडौंं, असोज १ । गत बिहीबारदेखि बेपत्ता बोलेरो चालकको शव सिन्धुलीको फिक्कलमा भेटिएको छ । सिन्धुपाल्चोकको तातोपानी–बाह्रबिसे सडकबाट बिहीबार बा २० च २१८५ नम्बरको बोलेरो भोटेकोशीमा खसेको थियो ।

उक्त दुर्घटनामा परेकी बाह्रबिसे–९ की सुन्तली तामाङको शव शनिबार नै भेटिएको थियो । चालक भने बेपत्ता भएका थिए । प्रहरीका अनुसार बोलेरो चालक अन्दाजी ३५ वर्षीय सानु तामाङको शव सोमबार सिन्धुलीको फिक्कलस्थित सोखुखोला नजिकै सुनकोशी नदीमा फेला परेको हो ।

सशस्त्र प्रहरीका अनुसार मृतकका छोराले उनको शव सनाखत गरेका हुन् । शव परीक्षणका लागि धुलीखेल अस्पताल लगिएको छ ।सशस्त्र प्रहरीका अनुसार विपद् व्यवस्थापन वेश क्याम्प खुर्कोटबाट खटिएको गोताखोरसहितको टोलीले बोलेरो चालक तामाङको शव फेला पारेको हो ।