साउन १३, काठमाडौँ । कक्षा ११ को छात्रवृत्तिका लागि लिइएको परीक्षाबाट मनोनयन सूचीमा परेका दुई हजार ८५९ जना विद्यार्थीका नाम शनिवार (साउन १२ गते) प्रकाशन भएको छ ।

काठमाडौँ महानगरले छात्रवृत्ति छनोट समितिको निर्णय अनुसार आज सूची प्रकाशन गरेको हो । विद्यार्थीहरूले प्रवेश पत्र प्राप्त गरेकै इमेल र एसएमएस विधिबाट आफ्नो सिफारिस सम्बन्धी जानकारी पाउन सक्नेछन् ।

नाम प्रकाशन भएका विद्यार्थीले साउन १५ गतेभित्र भर्ना भइसक्नु पर्नेछ । छात्रवृत्ति छनोट समितिका संयोजक एवं शिक्षा अधिकारी गोविन्दप्रसाद शर्माले तोकिएको समयभित्र भर्ना नभए त्यसपछि कुनै पनि प्रकारको दाबी विरोध गर्न नपाइने बताए ।

साउन १५ गतेभित्र भर्ना नभई रिक्त रहेका सिट समेतका लागि दोस्रो सूची प्रकाशन हुनेछ । विज्ञान विषयमा छात्रवृत्तिका लागि लागि १ हजार ७५७ वटा छात्रवृत्ति कोटा उपलब्ध गराइएको छ । उत्तीर्णमध्ये १ हजार ६३७ जनाको नाम पहिलो सूचीमा प्रकाशन भएको छ ।

व्यवस्थापन विषयमा २ हजार ४९३ वटा छात्रवृत्ति कोटा छ । यस विषयका लागि पहिलो म्याचिङ् लिस्टमा १ हजार १४६ जनाको नाम प्रकाशित भएको छ । कानुन विषयमा १३६ वटा छात्रवृत्ति कोटा छ । मानविकी विषयमा अध्ययनका लागि १७३ वटा छात्रवृत्ति कोटा छ ।

शिक्षा विषयका लागि ७० वटा छात्रवृत्ति कोटा छ । छात्रवृत्ति कोटामा अध्ययन गर्न चाहने विद्यार्र्थीलाई आवेदन दिन महानगरपालिकाले असार १५ गते बिहान १० बजेबाट अनलाइन आवेदन फाराम खुला गरेको थियो ।