☰
कास्की । गण्डकी प्रदेशको मुख्यमन्त्रीमा सुरेन्द्रराज पाण्डेलाई नियुक्त गर्न सर्वोच्च अदालतले ४८ घण्टाको समय दिएको छ ।
एमाले दल नेता खगराज अधिकारीको विश्वासको मतसम्बन्धी प्रक्रियालाई असंवैधानिक ठहर गर्दै अदालतले पाण्डेलाई ४८ घण्टाभित्र मुख्यमन्त्री नियुक्त गर्न प्रदेश प्रमुख डिल्लीराज भट्टको नाममा आदेश दिएको हो ।
कांग्रेस दल नेता सुरेन्द्रराज पाण्डेले गत २५ वैशाखमा दर्ता गरेको रिटमा सोमबार अन्तिम फैसला गर्दै न्यायाधीश कुमार रेग्मी र सुनिलकुमार पोखरेलको इजालसले विश्वासको मत लिएको प्रक्रियालाई अवैधानिक ठहर गरेको हो ।
आगामी बुधबार साँझसम्म पाण्डे ठूलो दलको नेताको हैसियतमा संविधानको धारा १६८ को उपधारा ३ अनुसार मुख्यमन्त्री बन्ने छन् ।
एमाले दल नेता अधिकारीले गत २३ वैशाखमा प्रदेशसभाबाट विश्वासको मत लिएका थिए । त्यसबेला उनले पक्षमा जम्मा ३० मत पाएका थिए ।
सभामुख कृष्ण धितालले आफ्नो पनि समर्थन रहेको भन्दै अधिकारीले विश्वासको मत पाएको घोषणा गरिदिएका थिए ।
६० सदस्यीय प्रदेशसभामा विश्वासको मत पाउन कम्तीमा ३१ सांसद हुनुपर्नेमा ३० सांसदको विश्वासको मत पाउँदा बहुमत घोषणा गरिएकोमा कांग्रेस असहमत थियो ।
पाण्डेले अधिकारीले विश्वासको मत नपाएकाले उनको सरकार स्वतः ढलेकाले ठूलो दलको संसदीय दलको नेताको हैसियतले आफूलाई मुख्यमन्त्री नियुक्त गर्न परमादेश दिन पनि माग गरेका थिए ।
रिटमा प्रदेश प्रमुख डिल्लीराज भट्ट, सभामुख कृष्णप्रसाद धिताल, मुख्यमन्त्री खगराज अधिकारी, मुख्यमन्त्री तथा मन्त्रिपरिषद्को कार्यालयलाई विपक्षी बनाइएको थियो ।
