काठमाडौँ । एमालेले पार्टीभित्र आर्थिक र यौन आचरण मौलाएको भन्दै यस्तो प्रवृत्तिले पार्टीलाई जनताबाट अलग गर्ने खतरा पैदा भएको जनाएको छ ।

मंगलबार सुरु भएको पार्टीको सातौँ केन्द्रीय कमिटी बैठकमा प्रस्तुत शुद्धीकरण र पार्टी सुदृढिकरण सम्बन्धी दस्ताबेजमा नेता कार्यकर्तामा मौलाएको आर्थिक र यौन आचरणका कारण नेता, कार्यकर्ता र समग्र पार्टीलाई नै अलग गर्ने खतरा पैदा भएको भन्दै चिन्ता व्यक्त गरिएको हो ।

‘हामीले आर्थिक सामाजिक क्रियाकलाप, यौन आचरण र नैतिक दृष्टिले गल्ती गर्नेहरुलाई सम्बन्धित कमिटीमा छलफलको कार्यसूची र कारबाहीको विषय नबनाउँदा यस्तो प्रवृत्ति प्रोत्साहित हुन पुगेको छ’, केन्द्रीय समिति सदस्यहरुलाई वितरण गरेको दस्ताबेजमा भनिएको छ । त्यस्तै एमालेले नेता कार्यकर्ताहरुमा बुजुर्वा कार्यशैली हाबी भएको भन्दै सर्वहारा श्रमजीवी वर्ग पक्षधर बन्नुको विकल्प नभएको जनाएको छ ।

‘हामीलाई बुर्जुवा कार्यशैली जीवनशैली अपनाउने छुट छैन, हाम्रो जीवनशैली र कार्यशैली निःसन्देह सर्वहारा श्रमजीवी वर्ग पक्षधर हुनुपर्छ’, एमालेले भनेको छ, ‘हाम्रो आचरण, व्यवहार र जीवन जिउने काइदा मुलुकको संविधान, प्रचलित कानुन सामाजिक नैतिकताको सीमाअनुकूल हुनुपर्छ ।’

जनताले उचित नठान्ने कामकारबाहीबाट जोगिन पनि एमालेले नेता कार्यकर्तालाई सजग गराएको छ । ‘पार्टीभित्र प्रचलित कानुन सामाजिक प्रबन्ध र नैतिकताका दृष्टिकोणले अनुचित क्रियाकलाप देखा पर्न थालेका छन् । आफूलाई अरुभन्दा विशेष ठान्ने र आफ्ना लागि विशेष व्यवस्थाको अपेक्षा गर्ने प्रवृत्ति देखा परेका छन्’, एमालेले भनेको छ ।

साथै केन्द्रीय सदस्यहरुलाई पार्टीमा आर्थिक र नैतिक आचरणलाई कसरी स्वच्छ, पारदर्शी र कानुनसम्मत बनाउने भनेर प्रश्न गरेको छ ।
जनआधारित कार्यकर्ता पार्टी निर्माणका लागि सोधिएका प्रश्नको जवाफ खोज्न जरुरी रहेको समेत एमालेले जनाएको छ ।