काठमाडौँ । पूर्वमन्त्री गोपाल किरातीको संयोजकत्वमा तेस्रो जनआन्दोलन समिति गठन भएको छ । किराती पूर्वमाओवादी नेता हुन् । आज रिपोर्टर्स क्लबमा पत्रकार सम्मेलनमार्फत् गत माघ २० गते ललितपुरस्थित किरातयाक्थुङ चुम्लुङको भवनमा बसेको बैठकले कोशी प्रदेश नामाङ्कन खारेजी र पहिचानसहितको समाजवादका लागि समिति गठन भएको जानकारी गराइयो ।

उक्त समितिको संयोजक किराती रहेका छन् भने सदस्य सचिवमा कृष्ण चोङ्बाङ छन् । गठित तेस्रो जनआन्दोलन समितिका सदस्यहरूमा विश्वेन्द्र पासवान, बुद्धराज लामा, बलदीप राई, रामनारायण पाल, चन्द्र श्रीशमगर, राम मगर, तिलक मगर, आशा तामाङ, रामभक्त कुरुम्बाङ, खगेन्द्र माखिम, एविराज आङ्देम्बे, दलमर्दन कामी, आरएन राई, सोविनथिङ, रेखराज राई, चेतन तुम्बाहाङ, डा.मित्र परियार र लोकेन्द्रराज थापा रहेका छन् ।

ब्राम्हणवादी सत्ताको अन्त्यका लागि तेस्रो जनआन्दोलन तयारीमा केन्द्रित रहँदै दलाल पुँजीवाद र भ्रष्टाचारी शासनलाई ध्वस्त पारेर पहिचान सुनिश्चितताको समाजवादी व्यवस्था स्थापना गर्ने समितिको राजनीतिक लक्ष्य रहेको विज्ञप्तिमा उल्लेख छ ।
त्यस्तै, संविधानमा व्यवस्था भएको गणतन्त्र, धर्म निरपेक्षता, सङ्घीयता, समावेशीकरण, मौलिक हक, स्वतन्त्र परराष्ट्र नीति, भ्रष्टाचार अन्त्य र सुशासनका बाधक प्रमुख तीन दल रहेको समितिको ठहर छ । माओवादी, नेपाली कांग्रेस, नेकपा (एमाले) सहितका आलोपालो दल र शासकहरू नै प्रतिक्रान्तिको कारक तत्व भएको समितिले उल्लेख गरेको छ ।

समितिले तीन ठुला दललाई जनआन्दोलन र मधेस आन्दोलनका उपलब्धि रक्षाका लागि सार्वजनिक आत्मालोचनासहित रूपान्तरणका लागि आग्रह गरेको छ । अन्यथा दलित, श्रमिक तथा विस्थापित वर्ग, लिङ्ग, जातजाति, क्षेत्र एवम् देशभक्तहरूको तेस्रो जनआन्दोलनको ज्वारभाटाले ध्वस्त पारिदिने उनीहरूको चेतावनी छ । साथै, कोशी लगायत बागमती, गण्डकी, कर्णाली जस्ता प्रदेशका नामहरू खारेज गरी पहिचानको आधारमा नामाङ्क नगरिनुपर्ने उनीहरूको माग छ ।

समितिका संयोजक किरातीले ब्राम्हणवादी सत्ताको अन्त्य र पहिचानसहितको समाजवादका लागि तेस्रो जनआन्दोलनको आवश्यकत्ता परेको बताए । उनले ब्राम्हण जनता र ब्राम्हणवादी सत्ता फरक भएको दाबी गरे । कांग्रेस, माओवादी र एमालेको रवैया प्रतिक्राति र ब्राम्हणवादी भएको उनको आरोप छ । आफूहरूले तीन ठुला दललाई एकपटक सच्चिनुस् भनेर भनिरहेको उनले बताए । आफूहरूले देशव्यापी रुपमा आन्दोलन चर्काउन चाहेको उनको भनाइ छ । उनले अब प्रतिक्रान्तिको भण्डाफोर गर्ने चेतावनीसमेत दिए ।

‘देशभरि पहिचान र समाजवादको आवश्यकताको संषर्घ चलिरहेको छ । देशव्यापी शक्ति जुटेर यो काम अगाडि बढाउन र प्रतिक्रान्तिको जुन तयारी भइराखेको छ, त्यस विरुद्ध भण्डाफोर गर्न । भौतिक रूपमै गइहाल्ने हाम्रो तयारी चाहिँ भएको छैन,’- किरातीले भने ।

२०७४ सालमा पुष्पकमल दाहाल ‘प्रचण्ड’ले पहिचानको मुद्दा त्यागेर अन्यत्र गएपछि आफूहरू छुट्टिएको उनको भनाइ छ । माओवादीका कार्यकर्ता, घाइते, सहिद परिवारको तहमा माओवादी विचार, भावना र संस्कार जीवितै रहेको उनको भनाइ छ । तर, नेतृत्वको तहमा सबै खाओवादी भएको र प्रचण्ड ढेडू खाओवादी बनेको उनको टिप्पणी छ । त्यसैगरी समितिका सदस्य सचिव कृष्ण चोङ्बाङले २०६२/०६३ सालको आन्दोलन र जनताले लेखेको संविधान लागू भइसकेपछि पनि विभेदहरू कायमै रहनु कल्पना भन्दा बाहिरको कुरा भएको बताए ।

उनले विभेद र असमानता राज्य संयन्त्रबाटै लादिएको बताए । त्यसको विरुद्धमा जनताहरु आन्दोलित भइरहेको र राजनीतिक नेतृत्वले पनि सोच्ने बेला आएको उनको भनाइ छ । ‘हामीले गर्वका साथ राम्रो संविधान लेख्यौँ भनेर भन्यो । संविधान लागू हुँदा पनि विभेदहरू कायमै रहनु विडम्बना हो । तपाईं हामीले कल्पना गरेको व्यवस्था आउन बाँकी नै छ,’- उनले भने ।