काठमाडौं । काठमाडौंको गोंगबुमा सञ्चालित गोंगबु भैरव बहुउद्धेश्यीय सहकारी संस्थाको तेस्रो साधारणसभा सम्पन्न भएको छ ।

अध्यक्ष रत्नप्रसाद अनामणि श्रेष्ठको अध्यक्षतामा सम्पन्न साधारणसभामा सयको हाराहारीमा सेयर सदस्यहरुको उपस्थिति थियो । कार्यक्रममा मन्तव्य राख्दै अध्यक्ष रत्नप्रसाद अनामणि श्रेष्ठले छरिएर रहेको पुँजी जम्मा गरी कोसेली हाउस खोल्ने योजना सुनाए । उनले त्यसका लागि हातको सीपबाट बनाइएका सामानहरु बेच्ने स्टल राख्नु पर्ने बताए ।

सो अवसरमा बोल्दै अध्यक्ष श्रेष्ठले आफूहरु हाल देशमा देखिएको आर्थिक समस्याको जानकार रहेको र चनाखो रही सहकारी सञ्चालन गर्ने बताए । कार्यक्रमका विशिष्ट अतिथि डा.सैलेन्दु नेपालले संघ संस्थामा आवद्ध रहँदाका अनुभूतिहरु सुनाउँदै हाल देशका केही सहकारीहरुमा देखिएका समस्याहरुबाट सचेत रहँदै सहकारी सञ्चालन गर्न सुझाव दिए ।

कार्यक्रममा सो सहकारीका सचिव दामोदर ढकालले संस्थाको वार्षिक प्रतिवेदन पेश गर्दै गोंगबु भैरव सहकारीले कमाउने उद्धेश्यले लगानी नगरेको र बरु आफ्नै सेयर सदस्यहरुलाई नै व्यापार-व्यवसाय गर्नका लागि ऋण प्रवाह गरिएको बताए ।

साधारणसभामा कोषाध्यक्षको तर्फबाट प्रतिवेदन पेश गर्दै कोषाध्यक्ष कृष्णबहादुर केसीले अघिल्लो साधारणसभामा सेयर रकम बृद्धि गरी एक करोड पुर्याउन गरिएको प्रतिवद्धता पूरा नभएकोले अर्को वर्ष सो लक्ष्य पूरा गर्न सबै सेयर सदस्यहरु गोलबन्द भइ लाग्नु पर्नेमा जोड दिए । कार्यक्रमको सञ्चालन सचिव दामोदर ढकालले गरेका थिए ।